OÉ-CUSSE, 20 juñu 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hateten, sei koordena Governu Sentrál liuhosi Ministériu Negósiu Estranjeiru no Kooperasaun (MNEK), Ministériu Interiór (MI) no Ministériu Finansa (MF) hodi reativa hikas bazár populár iha liña fronteira Pássabe hodi kombate tranzasaun ilegál.
Asuntu ne’e refere hosi Komandante FALINTÍL-Forsa Defeza Timor-Leste (F-FDTL) komponente Terrestre destaku iha Rejiaun Oé-Cusse, Kapitaun Baldino Martins, bainhira aprezenta rezultadu sensibilizasaun asuntu fronteira nian iha ámbitu enkontru kortejia ho Autoridade RAEOA iha salaun Gabinete ZEESM Oé-Cusse, segunda ne’e.
“Ohin ami enkontru kortejia ho kapitaun F-FDTL komponente terrestre iha RAEOA, ohin mai aprenzenta, asuntu ida kona-bá bazár iha Pássabe, sei ita-bele loke fila-fali tanba iha semana liubá, sira ba halo sosializasaun ba asuntu fronteira nian, rona populasaun hosi Pássabe, husu atu ativa fila-fali bazár populár iha fronteira Pássabe,” Arsénio Paixão Bano, informa ba jornalista sira hafoin remata enkontru kortejia iha Gabienete ZEESM, Oé-Cusse.
Nia hatutan, asuntu ne’e ba RAEOA laiha problema, husi ita-nia parte Timor-Leste nian, ita iha kondisaun mínima iha Pássabe, hanesan iha servisu Alfándega, Migrasaun, Polísia Unidade Fronteira (UPF) no mós iha administrasaun, entaun presiza de’it halo koordenasaun ho parte Indonézia nian.
Tanba tuir Komandante nia propoin komunidade sira preokupasaun katak, katak hosi parte Indonézia nian, militár ho migrasaun hatete, dehan laiha problema.
“Ne’e maka ha’u dehan, só álfándega maka ita tenke koordena, depois ita mós tenke hato’o informasaun no koordena ita-nia servisu Governu Sentrál liuhosi Migrasaun, Ministériu Negosiu Estranjeiru no Kooperasaun (MNEK), Ministériu Interiór (MI), no Ministériu Finansa (MF) kona-bá pagamentu nian,” nia katak.
Nune’e ezekutivu ne’e konsidera, asuntu ne’e importante no inisiátiva di’ak, tanba antes ne’e la’o tiha ona, tanba bainhira reativa hikas bazár popular iha fronteira Pássabe, sei hamenus transasaun ilegál.
Arsénio Paixão Bano, konfirma, iha ámbitu enkontru ne’e, Autoridade RAEOA husu partisipasaun parte F-FDTL nian atividade komunitária nian liu-liu ba asuntu dezastre naturál no desportu.
“Ohin ami ko’alia mós kona-bá partisipasaun F-FDTL nian, ha’u agradese tanba, sira-nia prezensa iha Oé-Cusse, tantu hosi forsa terrestre no navál, ne’e halo Oé-Cusse nia konfiansa iha, katak rai soberanu ne’e iha nia lutu ba nasaun ba protesaun sira, ne’ebé sempre fó konfiansa ba populasaun, liuliu iha liña fronteira, nune’e Autoridade husu ba partisipasaun F-FDTL Oé-Cusse ninian, kona-bá atividade komunitária, hanesan dezastre naturál, desportu ne’ebé envolve komunidade,” nia orgullu.
Entretantu, bazár populár iha fronteira Pássabe taka dezde situasaun pandemia COVID-19 iha 2020, to’o ohin loron seidauk reativa, tán ne’e Autoridade RAEOA lideradu Arsénio Paixão Bano sei koordena ho Governu Sentrál hodi reativa hikas iha tinan 2023 ne’e.
Notisia relevante: Embaixadór Indonézia-PAM Bobonaro diskute re-ativa merkadu tradisionál iha fronteira
Jornalista: Abílio Elo Nini
Editor: Evaristo Soares Martins
