Veteranu seidauk foti uniforme iha edifísiu konselu veteranu
COVALIMA, 20 juñu 2023 (TATOLI)–Prezidente Konsellu Munisipál Kombatente Livertasaun Nasionál Covalima, Osório Soares “Mausoko”, hateten prosesu suku uniforme ba veteranu sira iha Covalima ne’e iha uniforma balun to’o ona no daudaun ne’e iha hela edifísiu Konsellu Veteranu, maibé na’in seidauk foti no balun seidauk mai.
“Kona-ba uniforme ba veteranu sira balun rai hela iha edifísiu Konsellu Veteranu, maibé veteranu sira seidauk foti. Balun sei iha prosesu, nune’e seidauk to’o mai Timor-Leste,” Osório Soares “Mausoko” hateten ba Agência Tatoli, iha nia kna’ar fatin, Tabalok, tersa ne’e.
Nia hateten, Covalima iha nia postu administrativu hanesan Zumalai ne’ebé uniforme rai hela iha edifísiu maibé veteranu sira seidauk foti.
Maibé, nia dehan, postu administrativu Suai, Fatululik, Fatumea, Fohorem, Maucatar no Tilomar seidauk to’o mai tanba sei iha prosesu nia lasan.
Entretantu, prosesu atu suku uniforme, veteranu kontribui osan kada ema na’in-ida $155 la’ós fó dala-ida, maibé selu ba faze dahuluk bainhira atu sukat $80, hafoin uniforme to’o ihaTimor-Leste mak sei selu tan osan $75 ho totál hamutuk $155.
Uniforme veteranu ho presu $155 ne’e, tanba kompaña suku ho pakote hanesan kalsa, kamiza, kazaku, gravata no xapeo, ne’ebé ba veteranu sira kór mutin malahuk no ba martir sira kór mean ne’ebé sei suku iha Indonézia.
Tuir dadus hosi Konsellu Munisipál Kombatente Livertasaun Nasionál, Munisípiu Covalima rejista veteranu hosi postu administrative hitu hamutuk 2000-resin.
Jornalista : Celestina Teles
Editór : Cancio XimenesS
