Autoridade Covalima sei orienta SMJT kontrola presu foos iha merkadu Debos
COVALIMA, 21 juñu 2023 (TATOLI)–Sekretáriu Administradór Munisípiu Covalima, Francisco de Jesus Alves, sei orienta ekipa Servisu Munisipál Jestaun Merkadu no Turizmu (SMJT) atu kontrola presu foos sa’e iha merkadu Debos.
“Agora daudaun sei akontese presu foos sa’e ho informasaun ida-ne’e ami sei orienta ba ami-nia Servisu Munisipál Jestaun Merkadu no Turizmu (SMJT) atu bele observa iha terrenu atu nune’e bele normaliza presu foos iha merkadu,” Francisco de Jesus Alves hateten ba Agência Tatoli, iha salaun AMC, Sukaer Laran, kuarta ne’e.
Nia hateten, presu foos mudansa tanba foin lalais akontese estoke gazolina laiha entaun presu sasán iha markadu sa’e, tanba transporta hosi Dili mai iha Suai dook hodi fó impaktu ba mudansa presu foos iha merkadu Debos.
“Ha’u hanoin mundansa presu foos ita hotu hatene liga ho problemae stoke gazolina hotu entaun presu foos sa’e tanba transporta hosi Dili mai iha Suai entaun impaktu ba presu maibé presu gazolina normál entaun presu tenke normál fali,” nia dehan.
Ho nune’e, nia parte sei orienta ba Servisu Munisipál Jestaun Merkadu no Turizmu (SMJT) hodi ovserba presu foos iha maerkadu debos.
Antes ne’e, Funsionáriu Ministériu Turizmu Komérsiu no Indústria (MTCI) Covalima, sei kontrola presu foos iha merkadu Debos, postu administrativu Suai, munisípiu Covalima.
Entretantu, komunidade iha Covalima hato’o ona preokupasaun kona-ba presu foos ne’ebé sae iha merkadu kilograma 25 hosi $12 sa’e ona $16.00.
Loja na’in Arumi, Domingas de Jesus klarifika, loja sira hasa’e presu foos iha merkadu la’ós, tanba sira-nia hakarak maibé mudansa presu foos iha nasionál, hanesan sira sosa foos kilograma 25 ho presu $15.00 entaun faan iha Suai ho presu $16.00.
Jornalista : Celestina Teles
Editór : Cancio Ximenes
