CNRT-PD propoin Deputada Maria Fernanda Lay kandidatu Prezidente PN
DILI, 21 juñu 2023 (TATOLI)–Partidu Congresso Naçional de Reconstrução Timorense (CNRT) ho Partidu Demokrátiku (PD) propoin Deputada Maria Fernanda Lay hosi bankada CNRT sai kandidatu ba Prezidente Parlamentu Nasionál.
Tuir karta ne’ebé Agênsia Tatoli asesu, kuarta ne’e, hosi bankada parlamentár CNRT ho PD haruka ona karta ba atuál Prezidente Parlamentu Nasionál, Aniceto Longuinhos Guterres Lopes, ho asuntu deklarasaun subskrisaun katak Deputada Parlamentu Nasionál eleitu proposta hosi partidu CNRT-PD, subskreve kandidatu Deputada Maria Fernanda Lay ba eleisaun Prezidente Parlamentu Nasionál, ne’ebé asina hosi Deputadu proponente hamutuk na’in-17 ne’ebé kompostu hosi CNRT na’in 15 no PD rua.
Iha karta refere, asina mós hosi Deputada Maria Fernanda Lay ne’ebé deklara aseita ho nia kandidatura.
“Tama ona iha meza Parlamentu ne’ebé mai hosi koligasaun CNRT-PD, ha’u hanoin mak ida-ne’e duni karik, tanba ha’u mós ohin asina lista ida nu’udar kandidatu ba Prezidente Parlamentu Nasionál. Mezmu ha’u la haree naran, tuir ita-boot sira dehan, maibé ita-boot sira hein iutoan aban bele haree<” Vise bankada CNRT iha Parlamentu Nasionál, Deputadu Patrocínio Fernandes, hateten ba jornalista sira iha sala bankada CNRT iha PN, kuarta ne’e.
Nia hateten, pozisaun partidu ho koligasaun nian ba kandidatu aprezenta asume kna’ar ho responsabilidade tomak halo buat ruma tuir kompromisu ne’ebé iha.
Entretantu, partidu CNRT ne’ebé sai vensedór ba eleisaun lejislativa iha tinan 2023 hetan asentu Parlamentár ho kadeira 31 ne’ebé koligasaun ho PD ho kadeira neen (6), nune’e ho forsa polítika maiória parlamentár kadeira 37 iha PN ba lejislatura daneen.
Entretantu, tuir observasaun jornalista Agência Tatoli iha Parlamentu Nasionál, iha tuku 11h47 Deputada Maria Fernanda Lay, hakat ba iha gabinete Prezidente Parlamentu Nasionál, Aniceto Longuinhos Guterres Lopes hodi hasoru durante minutu 30-resin.
Mezmu nune’e, hafoin ramata hasoru malu, jornalista TATOLI, tenta konfirma ho Deputada Fernda Lay, maibé la ko’alia ba nia kandidatura ne’e.
“Ha’u lahatene, tenke tetu lai lista. Ha’u lahatene sira lori ba ona ka seidauk, tanba ami sibuk hela ho reuniaun ba aban nian,” nia dehan.
Enkuantu iha kinta (22 juñu 2023) aban, Parlamentu Nasionál sei realiza reuniaun dahuluk lejsilatura daneen ka pose Deputadu foun.
Tuir guiaun ajenda Parlamentu Nasionál nian ba aban ne’e, sei hala’o eleisaun ba kandidatu Prezidente Parlamentu Nasionál foun.
Jornalista : Nelson de Sousa
Editór : Cancio Ximenes
