Implementasaun PMOPA faze dahuluk iha Fatumea seidauk finaliza
COVALIMA, 21 juñu 2023 (TATOLI)–Sekretáriu Administradór Munisípiu Covalima, Francisco de Jesus Alves, hateten implementaun Programa Mão de Obra Postu Administrativu (PMOPA) faze dahuluk iha postu administrativu Fatumea to’o agora seidauk finaliza.
“Iha postu Fatumea foin lalais ha’u ba, ha’u hanoin finaliza ona maibé tanba sira halo rotasaun sei kontinua hela no ita sei finaliza fulan ne’e. Tanba ne’e, ita taka nune’e sira submete relatóriu mai iha administrasaun,” Francisco de Jesus Alves hateten ba Agência Tatoli iha salaun AMC, Sukaer Laran, kaurta ne’e.
Maske postu Fatumea seidauk finaliza maibé sekretária postu Fatumea sei finaliza iha semana ne’e fulan-juñu, nune’e bele relata proposta atu kontinua implementa PMOPA faze daruak.
“Ha’u hanoin semana ne’e finaliza, entaun sira lori relatóriu mai nune’e prepara ba segundu faze nian mai, tanba postu mak halo proposta mai atu implementa segunda faze,” nia dehan.
Tuir matadalan PMOPA la’ós atu hamoos estrada de’it maibé iha mós atividade seluk hanesan kuda ai-oan hanesan iha suku Suai Loro kuda ai-parapa atu bele moris sai fatin turizmu no evita dezastre naturál.
Implementasaun PMOPA faze daruak, nia dehan, orsamentu tau ona kada postu administrativu-sira ne’ebé kada postu administrarivu ho nia orsamentu rihun $100.
Hafoin finaliza implementa PMOPA, sei relata relatóriu PMOPA ba administrasaun munisípiu Covalima liuhosi servisu munisipál finansa nian.
Implementasaun PMOPA kada porstu administrativu aloka orsamentu rihun $100 ho nia ezekusaun ba faze dahuluk ezekuta 50% no ba faze daruak 50%.
Jornalista : Celestina Teles
Editór : Cancio Ximenes
