OÉ-CUSSE, 21 juñu 2022 (TATOLI) – Natar ektare 23 iha Holosa, aldeia Manuimpena, suku Lalisuk, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) ameasa falla kolleta tanba afeta hosi moras hare nia tahan sai mean no namlaek.
Notísia relevante: Agrikultór Lalisuk hahú halai natar ba époka dahuluk
Agrikultór sira hosi natar Holosa, Herculano Casenube ho Acacio Cofitalan, preokupa tanba laiha koñesimentu natoon hodi prevene moras ne’e, tanba hare nia tahan sai mean no namlaek, sempre akontese kada tinan.
Nune’e sira husu tulun ba Governu Timor-Leste liuhosi Ministériu Agrikultura no Peska (MAP), oinsa bele apoia ai-moruk, tanba durante ne’e, agrikultór sira esforsa ho meiu oi-oin maibé la konsege salva sira-nia hare.
“Tinan ida-ne’e akontese, baibain akontese hanesan ne’e, ami husu ba parte agrikultura Governu nian, sei bele karik tau netik matan ba ami-nia hare hanesan ne’e, nune’e bele fó netik ai-moruk ruma hodi kura ami-nia hare, tanba tinan ne’e hotu-hotu balu mate tiha ona tanba moras ne’e,” Herkolanu Casenube, hato’o nia preokupasaun ba joranlista sira natar Holosa, kuarta ne’e.
Herculano Casenube, esplika, moras ne’e mosu inisíu hosi ulár-oan ka peste, anin hú monu iha hare nia hún, ikus mai hare nia tahan sai mean no namlaek, sira tenta atu kari pupuk, maibé sai mean fali.
“Ida-ne’e maka ami husu ba parte Governu, para bele tau matan ajuda netik ami, akontese primeiru ne’e, kuda hotu, komu anin bo’ot hú ba mai lakleur hare nia tahan ne’e namlaek, depois ami rega hodi ai-moruk, maibé nafatin namlaek no mean nafatin,” nia husu.
Fatin hanesan, agrikultór Acacio Cofitalan, reforsa-tán, moras ne’e akontese sira mós lahatene, bele hahú hosi ulár ki’ik-oan, anin hú hosi leten mak tun ka mak kona hare, mak hare nia tahan sai mean no namlaek, tan ne’e sira husu ba Governu nia apoia, tanba durante ne’e sira tenta halo prevensaun liuhosi rega ho ai-moruk maibé laiha solusaun.
Nia informa, iha tinan hirak ba kotuk, babain halai natar hodi kuda iha inisíu janeiru, maibé iha tinan 2023 ne’e, sira komesa fali iha fulan abríl mak akontese hanesan ne’e.
“Tinan ne’e ami tama fali iha abríl, ne’e akontese tinan rua ona, maibé ami labele kura, ami agradese kuandu Governu ajuda ami, tanba ami esforsa ona ho meiu oi-oin maibé la konsege salva hare sira, nia tempu kolleta iha agostu, agora hanesan ne’e ami lahatene, iha rezultadu ka la’e,” nia katak.
Nia hatutan, iha tinan kotuk, sira hetan ona vizita hosi Ministériu Agrikultura no Peska (MAP), foti tiha sampél lori hare nia tahan maibé to’o ohin loron seidauk iha informasaun oinsa salva hare sira bainhira tahan sai mean no namlaek.
Hatan ba asuntu ne’e, Xefe Departementu Agrikultura Bázika Familiár, Angelo Dorosariu, hateten, moras mean ne’e la’os foin akontese, maibé kleur ona, ekipa hosi MAP mós mai foti ona sampel maibé rezultadu to’o agora seidauk hetan, no moras mean ne’e karik halai natar tarde mak bele akontese.
“Moras ne’e ami deskonfia de’it, sira hatene klaru, katak ne’e moras ka hosi peste mak ataka, maibé klaru ne’e hosi moras, tan ne’e maka bainhira kuda tarde, mudánsa klimátika mós akompaña ikus mai bele akontese moras ne’e,” nia katak.
Parte seluk, tuir observasaun hosi Diresaun Agrikultura, katak, agrikultór sira dalaruma uza herbisida hodi uza ai-moruk naran Sapurata, ho intensaun atu rega ba duut, maibé afeta ba hare bele mate hotu.
“Durante ne’e esforsa oi-oin koko rega ho pestisida maibé la konsege prevene, entaun ita sei hein nia rezultadu teste hosi MAP, maka foin bele hatene nia ai-moruk atu kura moras ida-ne’e, tanba to’o agora mós ami seidauk hatene,”.
Xefe Departamentu ne’e konfirma, problema hare nia tahan sai mean no namlaek, la’os akontese de’it iha natar Holosá, maibé akontese mós iha natar sira seluk, tanba impaktu halai natar la tuir kaléndariu.
Notísia relevante: MAP kapasita estensionista RAEOA maneira salva ai-han hosi peste lakataru
Jornalista: Abílio Elo Nini
Editór: Evaristo Soares Martins
