Top

PN hala’o preparasaun ba reuniaun dahuluk lejislatura daneen

Parlamentu Nasionál (PN), kuarta (21 juñu) ne’e, hala’o preparasaun ikus ba reuniaun dahuluk lejislatura daneen iha loron 22 fulan-juñu tinan 2023. Imajen/Espesiál.

DILI, 21 juñu 2023 (TATOLI)—Parlamentu Nasionál (PN), kuarta ne’e, hala’o preparasaun ikus ba reuniaun dahuluk lejislatura daneen iha loron 22 fulan-juñu tinan 2023.

“Preparasaun atu simu ita-nia Deputadu foun ita halo antes tiha ona no ohin ne’e ami-nia preparasaun finál ona to’o lorokraik ne’e atu haree kondisaun bele fasilita ita-nia primeira reuniaun ba aban nian hahú iha tuku 10h00 dadeer. Ba ohin ne’e ami hahú koloka naran sira-ne’e tuir lista ne’ebé mak iha ho tau tan bandeira sira,” Sekretáriu Jerál Adjuntu Parlamentu Nasionál (PN), João Rui Amaral, hateten ba jornalista sira iha sala plenária PN.

Nia dehan, koloka mós fatin kona-ba bankada Governu no opozisaun ninian, nune’e hosi liman loos mai fali ne’e fatin bankada opozisaun FRETILIN, KHUNTO ho PLP no sorin karuk bankada Governu nian PD ho CNRT.

Nia esplika, tuir guiaun Prezidente Parlamentu Nasionál atuál mak sei halo abertura, no sekuénsia tuir mai sei iha diskusaun uitoan kona-ba deliberasaun ba komisaun verfikasaun podér, hafoin pauza minutu balun hodi komisaun hala’o nia serbisu hafoin hotu komisaun hatama fila-fali nia relatóriu hodi kontinua sekuénsia ba ajenda tuir mai.

“Komforme planu ne’ebé mak iha aban ne’e, eleisaun kandidatu eleisaun Prezidente Parlamentu Nasionál foun, no ohin, tuku 10h00 Prezidente Parlamentu husu para pelumenus kandidatu ba meza ne’e tenke tama ona,” nia dehan.

Enkuantu PN hasai ona karta konvite ba Deputadu eleitu na’in-65 hosi partidu hetan parlamentár iha tinan 2023 kompostu hosi CNRT, FRETILIN, PD, KHUNTO ho PLP.

PN mós konvida Deputadu lejislatura dalimak ne’ebé la ré-eleitu hodi partisipa reuniaun ne’e dahuluk lejislatura daneen.

Tuir observasaun jornalista TATOLI iha sala plenária nota katak tékniku sira hosi PN hala’o preparasaun fatin iha plenária laran hanesan tau naran iha plaka ba meza Deputadu eleisaun ida-idak nia fatin no mós bandeira kada partidu nian inklui preprasaun sira seluk tan.

Nune’e mós Deputadu eleitu lejislatura daneen balun haree informalmente sira-nia fatin iha sala plenária hodi bele hatene okupa tuir.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!