MALIANA, 22 juñu 2023 (TATOLI) – Povu, sosiedade sivíl no autoridade lokál sira iha munisípiu Bobonaro husu deputudu sesta lejizlatura iha Parlamentu Nasionál atu halakon lei pensaun vitalísia tanba konsidera fó de’it benifisiu ba grupu Polítiku sira maibé la fó vatajen ba povu no nasaun.
Paulino Teti-Mau nu’udar abitante Maliana, iha lejizlatura sira antes la konsege halo revizaun no altera le ne’ebé Parlamentu Nasionál aprova no Prezidente Repúblika promulga iha tinan 2006 ne’e, tanba polítiku sira hakarak atu garante no asegura de’it sira-nia moris.
Notisia relevante: Alterasaun lei pensaun vitalísia kaduka bele kontinua iha lejislatura daneen
“Ha’u lamenta tebes ho ljizlatura tuan sira-ne’ebé mak sira ko’alia, maibé nunka atu halakon, pensaun vitalísia ne’e tuir ha’u-nia obsrvasaun benefísiu de’it ba grupu kiik oan ida, ne’ebé nu’udar komunidade, hau hakarak rekomenda de’it ba lejizlatura foun karik bele rona mós povu ki’ik sira-nia lian, pensaun vitalísia ne’e povu hakarak halakon 100%, tanba nunka mais fó valór ba povu ki’ik sira-nia lian,” nia informa ba Tatoli, iha Maliana, kuarta ne’e.
Xefe suku Holsa, postu administratrivu Maliana, António Santa Cruz, sujere ba lejizlatura foun atu iha konsiénsia no seriedade hodi halakon lei pensaun vitalisia, tanba povu barak seidauk sente dezenvolvimentu iha baze no funsionáriu públiku barak mak simu saláriu mensál ho montante ki’ik.
“Ita-nia orsamentu tinan fiskál ne’e parlamentu aprova ho montante boot, maibé orsamentu ne’ebé to’o iha baze ne’e oituan de’it, tanba iha buat barak ne’ebé presiza atu hadi’a, ne’ebé aproveita iha biban ne’e ba iha deputadu foun atu asume ona kargu foun, ami sujere atu haree didi’ak lei pensaun vitalísia,” nia sujere.
Diretór Fundasaun Hader Munisípiu Bobonaro, Abel Perreira Mauresi, observa katak lei refere fó prejuizu ba estadu no kontribui ba hafraku ekonomia rai laran, tanba país Timor-Leste sei vulnerável no povu barak mak sei moris iha kiak no mukit.
“Ita hotu-hotu fó kontibuisaun hodi lee ne’e bele halo mudansa, altera ka halo revizaun oituan atu pensaun vitalísia ne’e labele fó valór di’ak, rekursu di’ak ba deputadu sira de’it, maibé konsidera mós povu ki’ik sira iha baze,” nia hateten.
Pontu fokál FONGTIL munisípiu Bobonaro ne’e rekomenda ba lejizlatura foun sira atu iha konsiensia no ba hato’o duni povu nia aspirasaun hodi debate iha uma fukun Parlamentu Nasionál.
“Ha’u-nia mensajen ba deputadu foun sira katak, sé ita-boot sira sente katak povu ne’e ita-nia, rai Timor ne’e ita-nia, entaun ita-boot sira tenke iha sentimentu oinsá atu valoriza ita-boot nia ne’e, la signifika ho valor orsamentu ne’ebé ita-boot sira tuur nu’udar deputadu, maibé orsamentu refere ita-boot sira aloka mai liuhosi ajénsia ruma, katak osan ne’ebé ami kontribui liuhosi organizasaun balu jere osan ne’e tún ba, ami hein simu relatóriu, atu ami ba haree impaktu realidade sira, oinsá mak bele halo mudansa ba povu nia moris,” nia katak.
Notísia relevante: PN lejislatura dalimak la konsege altera lei pensaun vitalísia
Jornalista : Sérgio da Cruz
Editór : Evaristo Soares Martins
