DILI, 21 Juñu 2023 (TATOLI) – Diretór Aprovizionamentu Servisu Autónomu Medikamentu Ekipamentu Saúde (SAMES), Nelson Correia rekoñese aimoruk paracetamol sirup estoke la iha armajen SAMES.
“Parasetamol sirup daudaun ne’e ita agora la iha, entaun aimoruk sira ne’e sei tama iha loron 22 jullu mak kompaña internasionál husi portugal nian foin hatama mai signifika hela loron 32 mak foin sasan ne’e tama mai hodi bele rezolve estock out sira iha fasilidade saúde sira”, Nelson Correia informa iha nia kna’ar fatin SAMES, ohin.
Nia dehan, SAMES buka solusaun liuhosi kompaña lokál sira iha Dili laran atu fó emerejénsia maibé sira mós estoke la iha hotu.
“Ami mos buka hela solusaun hodi buka kompanña lokál sira iha Dili laran maibé situasaun hanesan ho ita estoke la iha hotu”, nia afirma
Tanba ne’e akizasaun ba ekipamentu mediku ba tinan 2023 mak aimoruk balun sei to’o fulan oin atu bele rezolve probelma estock out iha fasilidade hotu iha Timor-Leste.
Nia dehan, estoke aimoruk la’os tau permanente iha ne’e maibé bainhira pedidu husi fasilidade saúde nian ida mai SAMES halo distribuisaun entaun númeru estoke aimoruk tun sae.
“Tanba ne’e estoke balun disponível no balun la disponível maibé fasilidade saúde sira halo pedidu mai ita responde no balun la iha, ita hein ba akizasaun 2023 ne’ebé sei to’o iha fulan oin”, nia esplika.
Iha sorin seluk, Xefe Sentru Saúde Comoro, Emilia Ayati de Sousa, hateten estoke aimoruk parasetamol sirup daudaun ne’e estoke mamuk iha Sentru Saúde Comoro.
“Paracetamol sirup fulan ida ona ita-nia estoke mamuk iha Sentru Saúde Comoro tanba ne’e ita halo ona pedidu ba SAMES maibé seidauk responde”, nia afirma.
Nia dehan, aimoruk parasetamol tablet daudaun ne’e sei sufiente hela so parasetamol sirup ba bebé sira mak estoke mamuk.
Agora daudaun Sentru Saúde Comoro estoke aimoruk iha fulan maiu nia laran la iha liuliu antibiótiku mak hanesan countri, diclofemac, doksis Ceftriaxone, maibé ba antibiotic ne’e ita bele buka alternativu seluk hodi uza antibiótiku seluk bele substitui”, nia konklui.
Jornalista : Felicidade Ximenes
Editór : Zezito Silva
