BAUCAU, 21 juñu 2023 (TATOLI) – Gabinete Primeiru Ministru liuhosi Unidade Misaun Kombate Stunting (UNMICS, sigla portugés) kuarta ne’e, realiza semináriu kona-bá hametin sistema ai-haan iha nível rejionál iha Baucau.
Adjunta Diretora UNMICS, Dirce Maria Soares Araujo, esplika, semináriu refere nu’udar kontinuasaun hosi dialogu nasionál ne’ebé antes ne’e realiza ona iha Dili ho objetivu atu hala’o diálogu hodi hametin sistema ai-haan iha rai-laran.
“Ita halibur ideia di’ak sira atu futuru iha planu hodi haree sistema ai-haan iha Timor-Leste,” Adjunta Diretora UNMICS hateten iha Vila Nova, kuarta ne’e.
Sistema ne’ebé presiza fó atensaun mak hanesan produsaun, prosesamentu, transportasaun, armazein, merkadoria to’o konsume iha uma-laran ne’ebè konsideradu nu’udar pakote ida hodi hametin ai-haan iha rai-laran.
Tuir estudu dadus má-nutrisaun iha Timor-Leste purvolta pursentu 47.7 komposta hosi pursentu 7 labarik krekas, seguransa alimentár grave pursentu 15.6, enkuantu moderadu pursentu 34.8, pursentu 36 konsidera sofre seguransa krónika ai-haan iha uma-laran no moderadu pursentu 21 no grave pursentu 15.
Alende ne’e, tuir dadus pursentu 74 labarik sira sofre moras diarreia kauza hosi menus asesu bee no saneamentu ne’ebé la adekuadu fó kontribuisaun ba má-nutrisaun aguda iha Timor-Leste.
“Bainhira sistema ai-haan di’ak sei fó impaktu ba saúde,” Dircia Araújo akresenta.
Liuhosi semináriu refere bele identifika difikuldade no buka solusaun nune’e rekomenda ba governasaun foun hodi rezolve problema ai-haan iha rai-laran no sai relatóriu ba governu atu tuir simeira iha Roma, Italia ne’ebé tuir planu sei realiza iha fulan-setembru tinan-ne’e.
Semináriu refere partisipa hosi reprezentante Autoridade Administrasaun Munisipál Baucau, Ministériu Agrikultura no Peska, reprezentante liña ministeriál iha rejionál leste; Lautém, Manatuto, Viqueque no Baucau hanesan Serbisu Munisipál Saúde, Serbisu Munisipál Agrikultura no Parseiru dezenvolvimentu sira.
Jornalista : Natalino Belo
Editór : Evaristo Soares Martins
