DILI, 21 juñu 2023 (TATOLI) – Kriasaun Departamentu Kooperativa iha Fakuldade Ekonomia iha Universidade Nasionál Timor Lorosa’e (UNTL) seidauk bele realiza tanba presiza prienxe rekizitu sira ne’ebé maka Ajénsia Nasionál Avaliasaun no Akreditasaun Akadémiku (ANAAA) estabelese ona.
Dekanu Fakuldade Ekonomia UNTL, Custódio Ximenes, informa UNTL no Sekretaria Estadu Kooperativa (SEKoop) servisu hamutuk atu estabelese departamentu ne’e ho objetivu mak atinje meta ba dezenvolvimentu no kapasitasaun rekursu umanu ba jerasaun foun sira iha área kooperativa.
“Ha’u konsidera atu kria kursu ida mós la fásil, tanba presiza atu prienxe rekizitu lubuk ida. Ha’u bele fó ezemplu, tenke iha rekursu umanu ho grau akadémiku doutoramentu espesífiku ba área kooperativa, infraestrutura ba kursu tenke adekuadu no tenke iha kooperativa rasik”, Custódio Ximenes dehan ba Tatoli iha kampus Ekonomia.
Nia relembra kooperasaun ne’e akontese dezde 2021, maibé to’o ohin loron laiha progresu, tanba hasoru difikuldade iha liña komunikasaun entre SEKoop no UNTL, liuliu Fakuldade Ekonomia.
“Tanba kritériu sira ne’ebé fakuldade submete ba SEKoop atu hetan konsiderasaun ne’e to’o agora laiha resposta. Ita hakarak estabelese planu ida, entaun presiza servisu hamutuk atubele atinje saida mak ita hakarak. Agora, ita laiha liña komunikasaun, entaun halo objetivu sira ne’ebé antes ne’e ita iha ona labele realiza”, nia realsa.
Nia esplika tan katak haree ba mandatu Governu Daualuk nian maka planu ida ne’e labele realiza ona nia husu ba SEKoop atu halo rekomendasaun ruma ba Governu foun, nune’e bele tau nafatin prioridade ba asuntu ne’e bainhira membru Ezekutivu ne’ebé tutela ba asuntu ne’e bele kontinua diskute nafatin ho UNTL.
“Tanba planu SEKoop nian ne’e pertinente loos halo universidade mós entuziamu hakarak atu estabelese mehi ne’e, maibé dalaruma Governu preokupa ho asuntu barak maka labele foku ba planu prioridade akadémiku nian”, salienta.
Fakuldade Ekonomia rejista estudante hamutuk rihun 2-resin no iha departamentu haat mak Komérsiu no Turizmu, Jestaun, Siénsia Ekonomia no Kontabilidade.
Ligadu ho kooperativa, dosente ne’e akresenta katak iha Fakuldade Ekonomia iha dixiplina ida mak ko’alia kona-ba kooperativa no estudante iha departamentu siénsia ekonomia no kontabilidade maka iha obrigasaun aprende dixiplina ne’e.
Jornalista: Tomé Amado
Editora: Maria Auxiliadora
