Xanana Gusmão sei partisipa reuniaun dahuluk lejislatura daneen iha PN
DILI, 21 juñu 2023 (TATOLI)—Prezidente Partidu Partidu Congresso Naçional de Reconstrução Timorense (CNRT), Kay Rala Xanana Gusmão, sei partisipa reuniaun dahuluk lejislatura daneen iha Parlamentu Nasionál (PN) iha 22 juñu 2023.
“Ami-nia Prezidente partidu CNRT ita-boot sira hatene nia kandidatu númeru primeiru (1) iha lista dos deputados, entaun primeira reuniaun sesta lejislatura ami-nia Prezidente Partidu sei hola parte para depois simu pose. Depois prosesu sira tuir mai, ita haree fali segimentu saida mak ita presiza halo, klaru nia sei mai,” Vise Bankada CNRT, Deputadu Patrocínio Fernandes, hateten ba jornalista sira iha PN, kuarta ne’e.
Iha fatin hanesan, Sekretáriu Jerál Adjuntu Parlamentu Nasionál (PN), Joao Rui Amaral, hateten PN hasai ona konvite ba Deputadu eleitu lejislatura daneen hamutuk na’i- 65 inklui prezidente CNRT, Kay Rala Xanana Gusmão no lideransa partidu polítiku sira seluk ne’ebé naran tama iha lista Deputadu.
“Konvite ne’ebé Prezidente Parlamentu Nasionál hasai ne’e sira-ne’ebé mak naran tama iha lista ne’ebé Tribunál notifika hetan hotu, sira hotu naran kompletu ona iha meza iha plaka ami prepara hotu ona, ne’eba sira naran tama hotu iha ne’e,” nia hateten.
Nia esplika, tuir guiaun ba reuniaun dahuluk lejislatura daneen ne’e Prezidente Parlamentu Nasionál atuál mak sei halo abertura, no sekuénsia tuir mai sei iha diskusaun uitoan kona-ba deliberasaun ba komisaun verfikasaun podér, hafoin pauza minutu balun hodi komisaun hala’o nia serbisu hafoin hotu komisaun hatama fila-fali nia relatóriu hodi kontinua sekuénsia ba ajenda tuir mai.
“Komforme planu ne’ebé mak iha aban ne’e eleisaun kandidatu eleisaun Prezidente Parlamentu Nasionál foun,” nia dehan.
Jornalista : Nelson de Sousa
Editór : Cancio Ximenes
