Autoridade Covalima aprezenta proposta projetu PDIM 7 ba konsellu munisipál
COVALIMA, 22 juñu 2023 (TATOLI)–Administrasaun Munisípiu Covalima liuhosi Diretór Planeamentu Integradu Dezenvolvimentu, Albino Carvalho Lelo, aprezenta proposta projetu Planeamentu Integradu Dezenvolvimentu hitu ba tinan fiskál 2024.
“Iha planu ba 2024 nian iha proposta hitu ne’ebé mak ha’u konsege aprezenta ona ba iha forum hodi deside hamutuk, lori proposta bele hetan aprovasaun reuniaun konsellu konsultivu munisipál iha semana oin,” Albino Carvalho Lelo hateten ba jornalista sira iha resintu AMC, Sukaer Laran, kinta ne’e.
Proposposta projetu PDIM hitu (7) ne’ebé diretór PDIM aprezentante hanesan konstrusaun rezidénsia sekretáriu Administradór Munisípiu Covalima, konstrusaun rezidénsia Administradór postu Zumalai, konstrusaun rezidénsia médiku iha suku Dato Tolu.
Proposta seluk mak konstrusaun rezidénsia ba médiku no Sentru Saúde iha Nainare, konstrusaun salaun enkontru postu Tilomar, reabilitasaun uma armajen no moru protesaun iha servisu notariadu no rejistu sivil.
“Projetu hirak ne’e ami sei halo diskusaun hein hetan aprovasaun iha konsellu konsultivu munisipál hafoin ami bele submete ona ba iha nasionál hodi hatama iha planu Orsamentu Jerál Estadu (OJE) 2024,” nia dehan.
Projetu PDIM hitu ne’ebé mak diretór aprezenta hanesan proposta, maibé iha semana oin sei aprezenta tan ba iha reuniaun konselu munisipál hodi hetan aprovasaun.
Antes ne’e, Parlamentu Nasionál aprova Orsamentu Jerál Estadu tinan fiskál 2023 ba munisípiu Covalima hamutuk $5,738.515 ne’ebé fó prióridade ba programa 11 mak hanesan estrada no ponte ho orsamentu $67,709, Dezenvolvimentu rurál no urvana $78,972, seguransa nasionál $105,079, asesu justisa $54,368.
Programa seluk mak boa-Governasaun no jestaun instituisionál $2,852,631, agrikultura $528,958, Agua no Saneamentu $165,441, Saúde $244,959, edukasaun no formasaun $1,446,477 igualdade jeneru no Inkluzaun sosiál $136,300 no Turizmu $57,621.
Jornalista : Celestina Teles
Editór : Cancio Ximenes
