Autoridade Covalima finaliza implementa projetu PDIM iha Zumalai
COVALIMA, 22 juñu 2023 (TATOLI)–Autoridade Covalima liuhosi Servisu Munisipál Planeamentu Integradu Dezenvolvimentu finaliza ona implementa projetu konstrusaun rezidénsia Administradór, edifísiu Administrasaun postu Maucatar kompleta ho moru protesaun no konstrusaun irrigasaun Beigui iha postu administrativu Zumalai.
“Projetu PDIIM tinan 2021 ne’ebé ita implementa iha tinan fiskal 2022, projetu hanesan konstrusaun rezidénsia Administradór Munisípiu Covalima, edifísiu postu administrativu Maucatar, moru protesaun haleu edifísiu postu Maucatar no konstrusaun kanal irrigasaun Beigui ne’ebé projetu fíziku finaliza ona,” Diretór Planeamentu Integradu Dezenvolvimentu, Albino Carvalho Lelo, hateten ba jornalista iha resintu AMC, Sukaer Laran, kinta ne’e.
Konstrusaun projetu moru protesaun postu Maucatar konstrui uza orsamentu restu hosi orsamentu konstrusaun irrigasaun Beigui iha suku Fatuleto, postu administrativu Zumalai, munisípiu Covalima.
“Konstrusaun moru protesaun edifísiu postu administratu Maucatar, ami jere osan restu hosi projetu konstrusaun irrigasaun Beigui ne’e mak ita hodi halo konstrusaun moru protesaun ba edifísiu postu Maucatar,” nia hateten.
Aleinde informa projetu PDIM, nia mós informa katak iha tinan 2023 Covalima laiha projetu PDIM maibé kontinua implementa proposta tinan fiskál 2021 to’o 2022 no tinan 2023 finaliza.
Diretór ne’e informa, iha tinan fiskal 2022 to’o 2023 laiha projetu ne’ebé indika atu hala’o maibé iha proposta prióridade liu matriks iha tinan 2021 ne’ebé restu la konsege implementa.
Entertantu, bazeia ba livru 3B Orsamentu Jerál Estadu Tinan 2021, ne’ebé Agência Tatoli asesu munisípiu Covalima prevee konstrusaun rezidénsia administradór munisípiu Covalima hamutuk $262,570 no konstrusaun edifísiu postu Maucatar ho moru haleu hamutuk $179,438.
Projetu konstrusaun irrigasaun Beigui ho nia naruk metru 1000 ho nia montante orsamentu $68,816 56.
Ho nune’e, iha loron 14 fulan-novembru 2022, Vise Ministru Administrasaun Estatál, Lino de Jesus Torrezão, inaugura konstrusaun edifísiu postu administrativu Maucatar no projetu konstrusaun rezidénsia administradór finaliza ona maibé seidauk halo inaugurasaun.
Jornalista : Celestina Teles
Editór : Cancio Ximenes
