Bombeiru Viqueque falta transporte no rekursu atende kazu emerjénsia
VIQUEQUE, 22 juñu 2023 (TATOLI)—Bombeiru Viqueque daudaun ne’e falta transporte no rekursu umanu atu atende ba kazu emerjénsia.
“Ami durante ne’e hasoru dezafiu falta transporte no rekursu hodi atende kazu emerjénsia sira hanesan ahi-han uma no seluk tan. Ami-nia karreta auto tanke médiu ne’e ho kondisaun ladún di’ak banhira halai dook no karreta ida a’at totál ne’e para de’it, ami uza de’it karreta ida marka Hillux maka daudaun ne’e ho kondisaun di’ak hodi atende kazu emejénsia sira-ne’ebé mosu iha Viqueque,” Komadante Bombeiru munisípiu Viqueque, Yohanes Un Klaran, informa iha ninia knaar fatin, Beloi, kinta ne’e.
Tuir Komandante ne’e, lori tempu halo manutensaun karreta, tanba ne’e espera parte relevante iha nasionál bele halo manutensaun lalais ba karreta ho kondisaun grave hodi bele fasilita Bombeiru nia serbisu.
“Foin lalais ami simu tan karreta tanke ida, maibé ami hakarak halo manutesaun ba karreta sira-ne’ebé ho kondisaun a’at no ami presiza mós karreta foun tanke ida hodi apoiu serbisu,” nia akresenta.
Notísia relevante : Bombeiru Viqueque presija kombustível
Difikuldade seluk ne’ebé Bombeiru Viqueque hasoru hanesan ai-monu taka dalan ruma, ekipamentu mákina tesi ai ninia korrente laiha no seluk tan.
“Sasán sira ne’e la fa’an iha Viqueque, nune’e tenke bá Dili mak sosa. Dalaruma ami husu ba nasionál, sira fó duni maibé limitadu. Ami daudaun ne’e uza mákina tesi ai rua, maibé ninia korrente maka laiha,” Yohanes Un relata.
Seluk tan, Bombeiru Viqueque seidauk iha fatin própriu, tanba ne’e daudaun okupa hela sentru juventude ninia fatin.
“Ami hakarak fatin própriu hodi bele uza iha tempu oin mai. Ida-ne’e maka hanesan ami-nia esperansa,” nia adianta.
Maski hasoru dezafiu oin-oin, maibé Bombeiru Viqueque nafatin halo esforsu halo serbisu bainhira mosu kazu emerjénsia ruma iha munisípiu Viqueque.
“Hahú hosi janeiru to’o juñu ami rejista ahi han uma tolu no barak liu ai monu taka dalan sira inklui ai monu hanehan komunidade sira-nia uma,” Komandante salienta.
Ekipa Servisu Bombeiru Viqueque daudaun ne’e na’in-21, ne’ebé fahe bazeia ba turnu kada semana.
Jornalista : Vitorino Lopes da Costa
Editora : Julia Chatarina
