DILI, 22 juñu 2023 (TATOLI) – Deputadu Bankada Frente Revolusionáriu Timor-Leste Independente (FRETILIN) Joaquim dos Santos, afirma FRETILIN sei sai opozisaun konstrutivu iha Parlamentu Nasionál durante lejislatura daneen.
“Opozisaun atu impoen Governu, buat ne’ebé sala atu hadia, atu impoen ba Governu buat ne’ebé los hodi dezenvolve, ami sei sai opozisaun konstrutivu”, Deputadu dehan ba Agência TATOLI, iha Parlamentu Nasionál, kinta ne’e.
Nia dehan, opozisaun tenke pro-povu bainhira desizaun polítiku ne’ebé kontra povu nia hakarak opozisaun tenke kontra.
“Desizaun ne’ebé afavor ba povu, opozisaun sei asegura, ne’e mak pozisaun ami nian”, Joaquim hateten.
Liuhosi plenária solene sesta lejislatura partidu Kongresu Nasionál Rekonstrusaun Timorense (CNRT) ho Partidu Demákratiku (PD) aprezenta lista kandidatura úniku Maria Fernanda Lay mak avansa ba Prezidente Parlamentu Nasionál foun hodi troka Prezidente sesante Aniceto Guterres.
Hosi kompozisaun meza hatudu ona partidu tolu mak tenke sai hanesan opozisaun iha sesta lejislatura mak hanesan FRETILIN, Kmanek Haburas Unidade Nasional Timoroan (KHUNTO) no Partidu Libertasaun Popular (PLP).
Iha biban hanesan deputadu KHUNTO Antonio Verdial hateten, maske opozisaun maibé nafatin apoiu ba dezenvolvimentu nasionál no mós apoiu totál ba kandidatura ne’ebé CNRT no PD propoen.
“Ida ne’e hanesan istória iha Timor-Leste, ita promove jéneru iha sesta lejislatura ne’e, KHUNTO haree ba oin haree ho vizaun ida ne’ebé di’ak tebes”, nia revela.
Ho nune’e, KHUNTO hakarak partisipa ba dezenvolvimentu ne’ebé fó moris di’ak ba povu liuliu interese ba ema hotu nian.
“KHUNTO sei reprezenta nia militante no simpatizante, inan no aman iha teritóriu tomak mak sei sai opozisaun ida konstrutivu”, nia hakotu.
Jornalista: Hortencio Sanchez
Editór : Zezito Silva
