DILI, 23 juñu 2023 (TATOLI) – Diretór Nasionál Farmasia no Medikamentu, Delfim Ferreira, informa Ministériu Saúde (MS) iha fulan jullu sei implementa sistema asycuda hodi kontrola medikamentu ne’ebé hatama mai Timor-Leste (TL).
“Iha inovasaun foun ne’ebé mak Diresaun Nasionál Farmasia no Medikamentu husi MS atu aplika mak ita finaliza ona prosesu ba asycuda nian, single windows, hahú semana oin, fulan jullu, ita hahú lansamentu ba sistema asycuda ida ne’e atu bele kontrola medikamentu sira ne’ebé importadór sira hatama mai ita-nia rai-laran”, Delfim Ferreira informa iha nia kna’ar fatin Caicoli, ohin.
Nia dehan, sistema asycuda ida ne’e, MS no Ministériu Finansas asina ona iha fulan kotuk liubá, entaun ba oin importasaun aimoruk no importadór farmasia sira sei utiliza sistema online asycuda ida ne’e atu atualiza sira-nia dokumentu no MS bele halo verifikasaun online no aprovasaun liuhosi online.
“Ida ne’e mak semana oin ita tama ona fulan jullu, ita bele implementa ona sistema online ka asycuda ida ne’e iha ita nia-rain, entaun ita iha sistema online sira seluk ne’ebé mak sei prepara hela atu bele asegura mós servisu rejistu medikamentu iha ita-nia rain”, nia afirma.
Nia subliña, bainhira sistema asycuda ne’e implementa, dokumentu ne’ebé mak mai husi importadór sira ne’ebé la rejistu automatikamente sistema ne’e rejeita ka la simu, entaun sistema nia benifísiu mak ida ne’e bainhira sistema la akapta signifika labele aprova.
“Maibé husi parte Inspesaun Saúde sira mak atu ba asegura katak ema sira ne’e tenke rejsita sira-nia kompaña rejista sira-nia produtu, ami hein de’it sira-nia disponibidade atu mai rejistu, se la rejistu ne’e kestaun inspesaun jerál nia atuasaun no tuir lei ne’ebé mak iha”, nia esplika.
Jornalista : Felicidade Ximenes
Editór : Zezito Silva