iklan

JUSTISA, HEADLINE

Publika uzu orsamentu PGR, Xefe Redasaun Hatutan.com presta deklarasaun

Publika uzu orsamentu PGR, Xefe Redasaun Hatutan.com presta deklarasaun

Xefe Redasaun Hatutan.com, Francisco Belo Simões da Costa Belo, kumpri notifikasaun hodi presta deklasaun iha Ministeriu Públiku. Imajen Tatoli/Natalino Costa.

DILI, 23 juñu 2023 (TATOLI) Xefe Redasaun Hatutan.com, Francisco Belo Simões da Costa Belo, kumpre notifikasaun hodi presta deklasaun iha Ministériu Públiku tanba notísia Hatutan.com ne’ebé publika, relasiona ho uzu orsamentu hosi Prokuradór Jerál Repúblika (PGR, sigla portugés) hodi halo viajen ba Portugal no Guiné-Bissau kona-ba reuniaun CPLP nian.

“Horseik, ha’u simu notifikasaun ida, hosi servisu investigasaun Ministériu Públika nian, atu mai presta deklarasaun iha tuku 10:00, ohin dader. Ha’u mai kumpre notifikasaun bolu naran Notifikasaun Komparénsia. Atu dehan katak Prokuradór ka Ministériu Públiku presiza ha’u nia deklarasaun ruma, relasiona ho notísia ne’ebé Hatutan públika kona-ba uzu orsamentu hosi Prokuradór hodi halo viajen ba Portugal no Guiné-Bissau’’, Francisco Belo Simões da Costa Belo, ba jornalista sira iha Prokuradoria Jerál Repúblika, Colmera, sesta ne’e.

Belo akresenta, iha notísia ne’e nia laran, Hatutan.com hetan dokumentus ida, kona-ba utilizasaun Orsamentu Estadu ne’ebé PGR uza hodi ba fatin rua ne’e, tanba ne’e, Ministériu Públiku konfirma kona-ba dokumentu ne’e.

“Ha’u mai presta deklarasaun hanesan baze ba informasaun sira. Hanesan sidadaun no jornalista, ha’u kumpre ona ha’u nia devér, hodi mai presta deklarasaun ho baze notifikasaun no ida ne’e mak ita-nian, hanesan sidadaun ninia kontribuisaun”, nia dehan.

Ulun hosi Redasaun afirma, Hatutan.com priénse ona rekezitu iha notísia, kumpre padraun universál jornalizmu, kumpre Kode Étika Jornalístika Timor-Leste nian, kumpre mós Lei Komunikasaun Sosiál.

Nia rekorda, hafoin publika notísia iha fulan maiu, Prokuradór Alfonso Lopez aprezenta ona karta direitu resposta no retifikasaun no Hatutan.com publika ona iha 20 maiu.

“Ida ne’e, hatudu katak ami kumpre ona rekezitu sira ne’ebé estabelese, ami kumpre mós lejislasaun sira ne’ebé merese ba jornalista atu kumpre signifika katak notísia ne’e, laiha violasaun ba prinsípiu univsersál jornalizmu nian, la iha violasaun bá kodigu konduta jornalístika, la iha mós violasaun bá Lei Komunikasaun Sosiál”, Belo hateten.

“Ne’e ita-nia baze legál, ita-nia kode étika mós hateten ida ne’e, tanba ne’e, ha’u sei la fó sai se mak fó dokumentu”, nia afirma.

Tuir Lei Komunikasaun Sosiál, artigu 19, númeru 4, hateten fó garantia ba jornalista nia sijíliu profisionál.

“Kona-bá oinsá maka Hatutan.com bele asesu dokumentu ida ne’e, ha’u la responde buat ida, tanba iha ita-nia Lei Komunikasaun Sosial, artigu 19, númeru 4, hateten, fó garantia ba jornalista ninia sijílu profisionál”, nia subliña.

Nia esplika, iha Lei Komunikasaun Sosiál, jornalista rai segredu profisionál ka sijílu profisionál hodi labele obriga, atu fó sai fonte sira informasaun nian, iha Kode Étika, númeru 4, ne’e hateten respeita kompromísu konfidensialidade ho fonte.

“Baze b buat rua ne’e, ha’u labele koalia buat ida kona-ba sasan sira ne’e, investigasaun ne’e, buat parte normál ida, ne’e servisu kompetente sira nian, Ministériu Públiku hanesan nain ba asaun penál, iha direitu tomak, atu konfirma buat ruma ne’ebé sente katak merese atu konfirma, no ita hanesan sidadaun, ita prontu kolabora de’it”, nia argumenta.

Antes ne’e, iha kinta (22/6) horseik Jornalista Hatutan Com. Rogerio Carceres kumpre uluk notifikasaun hosi Ministériu Públiku hodi presta deklasaun ba notísia ne’ebé hakerek no publika iha media online Hatutan.com.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!