COVALIMA, 23 juñu 2023 (TATOLI)–Diretór Sekretáriu Tékniku Administrasaun Eleitorál (STAE) Covalima, Francisco Gusmão hateten, STAE Covalima hala’o atendimentu resensimentu eleitorál hahú iha loron 13 fulan-juñu tinan 2023 ne’ebé rejista ona eleitór foun hamutuk na’in-25.
“Bazeia ba despaixu ne’ebé hosi Ministériu Justisa fó ba STAE nasionál no STAE Nasionál fó sai ba munisípiu, ne’ebé Covalima simu ekipamentu sistema dadus eleitorál 12 juñu husi ita-nia operadór, nune’e STAE Covalima hahú atende iha 13 juñu, ne’ebé rejista ona eleitór foun 25,” Francisco Gusmão hateten ba jornalista sira iha nia kna’ar fatin, Kampung Baru, sesta ne’e.
Hafoin simu orientasaun iha loron 13 fulan-juñu, STAE hala’o atendimentu ba sidadaun sira atu hasai kartaun eleitorál ba sidadaun ne’ebé hakarak hadi’a kartaun eleitorál.
Diretór ne’e dehan, tékniku STAE hala’o atendimentu halo resensiamentu eleitorál hahú segunda to’o de’it kinta, tanba iha loron sesta tékniku STAE labele halo atendimentu tanba prepara relatóriu atu submete ba iha STAE nasionál.
Atividade resensiamentu hanesan atividade rutina hosi STAE, entaun tékniku STAE hala’o atendimentu loro-loron ne’ebé foku hala’o atendimentu provizóriu iha munisípiu, seidauk dezloka ba postu sira.
Tékniku hala’o atendimentu ba sidadaun atu hasai kartaun eleitorál no atualiza dadus iha postu administrativu, bainhira simu ona orientasuan hosi Nasionál maibé agora STAE sei foku hala’o atendemintu iha munisípiu, tanba seidauk simu orientasaun atu dezloka ba postu administrativu sira.
Tuir dadus, tékniku STAE iha loron 13 fulan-juñu to’o horisehik ne’e, STAE hala’o atendimentu ba sidadaun trata kartaun eleitorál hodi rejista ona eleitór foun na’in-25 ne’ebé kompostu hosi mane 12 no feto 13, ba sidadaun ne’ebé hadi’a eleitorál hamutuk 61 ne’ebé kompostu hosi mane nain-39 no feto na’in-22.
Jornalista : Celestina Teles
Editór : Cancio Ximenes
