World Vision fasilita labarik prátika ko’alia iha públiku nia oin
COVALIMA, 23 juñu 2023 (TATOLI–Organizasaun Internasionál World Vision liuhosi programa Involvimentu Motivasaun Partisipasaun Asaun Komunidade Tinan barak (IMPAKT) fasilita formasaun ba labarik sira hala’o prátika ko’alia iha públiku nia oin no oinsá organiza atividade.
“Formasaun hanesan Edukasaun noun formál hodi hala’o prátika hanesan ohin labarik sira aprezenta oinsá sira bele ko’alia iha públiku, bele organiza atividade ne’e to’o ramata,” Líder IMPAKT aldeia Kunain, suku Matai, Julio Alex Afonso, hateten ba jornalista sira, iha Suku Matai, postu Maucatar, sesta ne’e.
Implementasaun programa IMPAKT ne’e, fasilita hosi World Vission atu eduka labarik adolensente sira hodi hasa’e abilidade moris halo mudansa ba komunidadem nune’e labele monu ba violénsia.
“Programa ne’e apoia hosi World Vissionno hala’o atividade ida-ne’e atu eduka adolesente sira-nia abilidade moris, nune’e halo mudansa ba komunidade rasik atu labele monu ba violénsia ne’ebe durante ne’e ita-nia inan sira hasoru iha suku,” nia dehan.
Durante implementa programa iha aldeia Kunain, komunidade nia partisipasaunto’o 75% tanba haree ba dínamika ideolojia inan-aman ladún tau interrese ba oan sira, dala ruma programa IMPAKT ida-ne’e iha orsamentu ne’ebé apoia husi ONG internasionál World Vission.
Tanba ne’e, nia enkoraja nafatin inan-aman katak formasaun ne’ebé fasilita hosi World Vission ne’e, programa ne’ebé importante atu kapasita labarik sira bele hasa’e sira-nia abilidade no muda sira-nia aan hosi adolente ba to’o adultu.
Jerente World Vission Covalima, João Moniz, hateteb programa IMPAKT atu kapasita joven sira no mobiliza joven sira seluk hetan formasaun, tanba programa ne’e apoiu fundu hosi Governu Amérika.
“Oinsá mak ita bele transforma joven bele minimiza violénsia doméstika, kualker krime iha sira-nia suku no aldeia laran, oinsa transforma sira sai lideransa iha futuru di’akliu. Programa ida- ne’e, ami hala’o iha suku 16 ne’ebé implementa iha postu Maucatar, Tilomar no Zumalai,” nia dehan.
Programa ne’e foku ba violénsia bazea ba jéneru no programa lubuk ida, oinsá mak bele minimiza violénsia doméstika no krime joven iha suku ka ladeia, fó formasaun ba membru IMPAKT sira, oinsá iha koñesementu no sai lideransa di’ak iha future no koko sira-nia mentalidade oinsá bele ko’alia iha públiku ne’ebé di’ak.
Xefe suku Matai, João Gusmão, hateten World Vission implementa nia programa iha suku Matai hahú tinan 2020 to’o ohin loron mak hala’o sensibilizasaun ba komunidade, fó formasaun ba joven sai IMPAKT, lidér loke klubu hodi identifika labarik idadie 12 to’o 18 komesa hala’o programa.
Programa fó formasaun ba labarik sira hahú hosi modúl 1 to’o 4 ne’ebé programa ohin hanesan kontinuasaun hosi hala’o prátika durante ne’e sira aprende sai hanesan tim lidér, agora fó formasaun kapasita labarik sira atu bele hala’o programa.
Lideransa komunitária hato’o agradesimentu baONG internasionál World Vission ne’ebé implementa sira-nia programa ne’ebé fó benefísiu ba povu, tanba haree programa ne’e labarik sira hatene buka resolve problema, oinsá atu buka solusaun ba problema nia hun, impaktu no solusaun sira bele ona halo prátika iha inan-aman nia oin.
Jornalista : Celestina Teles
Editór : Cancio Ximenes
