VIQUEQUE, 24 juñu 2023 (TATOLI)—Ministru Asuntu Parlamentár no Komunikasaun Sosiál (MAPKOMS), Fransisco Martins da Costa Pereira Jerónimo, inaugura sentru informasaun suku Macadique, postu adiministrativu Uatulari, munisípiu Viqueque.
Governante ne’e hateten, hateten liuhosi programa Naroman ba Suku hanesan meu ida atu fó naroman hodi promove rekursu sira iha suku liu-liu iha área rurál.
“Liuhosi Sentru Informasaun suku Macadiqui ne’e hari’i atu promove nia rekursu sira-ne’ebé mak sei izola hela, atu atualiza publikamente no trasa iha planu hodi dezenvolve nia área suku rasik. Tan ne’e, ha’u apela ba joven sira atu jere ekipamentu sira-ne’e ho didi’ak ba interrese komun ba komunidade hodi bele sai hosi fatin izoladu,” Ministru ne’e hateten liuhosi ninia diskursu, iha inaugurasaun sentru informasaun iha suku Makadique, sesta (23/06).
Governante ne’e hatutan, joven sira-ne’ebé sai responsavél kaer sentru informasaun ne’e atu jere ho didiak no promove suku Macadique ba nivel munisípiu no nasional liuhosi porta suku ida-ne’e ninian, tenke promove produtu lokál, kultura no turizmu ne’ebé mak iha suku Macadique atu ema hosi fatin seluk bele hatene.
“Ha’u husu ba komunidade liu-liu juventude sira hodi estuda nafatin, hadi’a-aan no kapasita-aan hodi kumprimenta globalizasaun tanba oin loron mundu teknólojia. Maske la fasil maibé ho vontade, motivasaun no estuda maka’as sei fasil ba ita atu hakat ba oin,” nia dehan.
Administrador Viqueque, Januario Soares “Bolly”, hato’o agradesimentu ba VIII Governu tanba ho mandatu ikus liuhosi MAPKOMS konsege estabelese sentru informasaun iha suku Makadique liuhosi programa Naroman ba Suku hodi fasil asesu no atualiza informasaun ba nesesidade ne’ebé komunidade hasoru iha suku Makadique, atu nune’e mundu bele koñese suku nia potensialidade.
“Ha’u agradese ba Governu liuhosi MAPKOMS ne’ebé establese ona sentru informasaun iha suku Makadique hodi bele uza atu halo promosaun ba potensialidade sira-ne’ebé mak iha suku ida-ne’e, nomós ba atividade sira seluk realiza iha suku ne’ebé halo públikasaun hodi ema hotu bele asesu ba meu informasaun sira-ne’ebé fó sai,” nia hateten.
Xefe suku Macadique, Afonso dos Reis, sente orgullu tanba MAPKOMS koloka programa “Naroman ba Suku” tama iha suku Macadique fó duni resposta ba pedidu sira-ne’ebé hato’o ba MAPKOMS.
“Ha’u sente orgullu tebes ba ministru ne’ebé mak aprova ami-nia pedidu ba estabelesimentu sentru informasaun suku Makadique. Tan ne’e, ami lahaluha agradese ba esforsu no vontade tomak mai iha suku Macadique,” nia dehan.
Nia hatutan, antes ne’e suku Macadique ida maibé foin lalais fahe ona suku tolu hanesan Macadique Uaitame, Madique de Baixo no Macadique de Cima, nune’e hosi estabelesimentu sentru informasaun ne’e sei kobre ba suku tolu ne’e.
Jornalista : Vitorino Lopes da Costa
Editór : Cancio Ximenes
