PR Horta ohin dezloka ba Alemaña
DILI, 24 juñu 2023 (TATOLI)—Prezidente Repúblika (PR), José Ramos Horta, sábadu ne’e, dezloka hodi hala’o vizita ofisiál ba Alemaña.
Tuir komunikadu ne’ebé Agência Tatoli asesu katak, Prezidente Repúblika hala’o vizita ofisiál ba Berlin, Repúblika Federal Alemaña, husi loron 25 to’o 26 fulan juñu, tinan ida-ne’e tanba xizita ida-ne’e mai iha sekuénsia ba konvite ne’ebé hato’o husi Prezidente Alemaña, Frank -Walter Steinmeier, iha inísiu tinan 2023.
Iha Berlim, Prezidente Repúblika, José Ramos Horta, sei halo enkontru bilateral ho ninia omólogu Alemaun ho mós Chanceler Olaf Scholz, Xefe Governu Alemaña nian.
Iha enkontru bilateral rua ne’e, líder sira sei ko’alia kona-ba situasaun prinsipál sira-ne’ebé akontese iha nível globál no rejionál, nune’e mós Prezidente Horta sei atualiza ba Prezidente Frank-Walter Steinmeier no Chanceler Olaf Scholz situasaun Timor-Leste nian, liu-liu kona-ba hafoun hikas proposta kooperasaun entre rai rua ne’e.
“Alemaña nu’udar ekonomia boot liu iha Europa, importante tebes atu Timor-Leste sai nu’udar rai ida-ne’ebé prioriedade liu ba nia,” Xefe Estadu ne’e hateten.
Xefe Estadu hateten, daudaun ne’e Alemaña ho Timor-Leste iha hela komunikasaun atu reformula kooperasaun Alemaña liga ho envíu ka haruka traballador timoroan sira ba servisu iha Alemaña.
PR hateten katak eminente adezaun Timor-Leste nian ba ASEAN, ne’ebé posibilita asesu ba merkadu ida ho ema hamutuk millaun 700, sei loke oportunidade ideal ba indústria Alemaña atu estabelese iha Timor-Leste, iha área espesializada sira.
Prezidente Repúblika iha vizita ho durasaun menus hosi oras 48 iha Berlim, sei akompaña husi Embaixador Timor-Leste nian ba Uniaun Europeia no mós Kónsul Jeral Honoráriu Timor-Leste nian iha Berlin.
Viajén ne’ebé hala’o ba Kontinente Europeiu, iha ajenda foun atu inkui mós partisipasaun Prezidente Repúblika nian iha Cimeíra “New Global Finance” konvite husi Prezidente Fransa, Emmanuel Macron, entre loron 21 to’o 23 fulan juñu ne’e, maibé partisipasaun refere kansela tanba koinsidénsia ho falesimentu Isabel Ferreia, espoza husi Primeiru Ministru, Taur Matan Ruak.
Ho vizita ida-ne’e, Prezidente Repúblika, José Ramos Horta, reafirma ninia empeñu kona-ba dezenvolvimentu no fortalesimentu kontínua ba lasu kooperasaun entre rai rua ne’e iha futuru.
Tuir ajenda, Prezidente Repúblika sei fila hikas mai Dili prevista iha loron 28 fulan juñu tinan 2023.
Jornalista : Nelson de Sousa
Editór : Cancio Ximenes
