VIQUEQUE, 24 juñu 2023 (TATOLI)—Sekretáridu Tékniku Adiministrasaun Eleitorál (STAE) munisípiu Viqueque, sábadu ne’e, distribui sertifikadu apresiasaun ba brigadista no polling staff sira-ne’ebé hala’o servisu iha eleisaun parlamentár 2023.
Sekretáridu Tékniku Adiministrasaun Eleitorál (STAE) Viqueque, Humberto Fernandes, hateten antes realiza atividade serimónia agradesimentu, STAE halo avaliasaun ba serbisu sira durante iha eleisaun parlamentár 2023 fion lalais, tanba avaliasaun sai hanesan sasukat ba eleisaun parlamentár ne’ebé susesu.
“Nune’e, ohin, ami konvida fila-fali autoridade suku, postu, munisípiu no seguransa, realiza serimónia agradesimentu ba parte hotu ne’ebé fó apoia ba ami iha eleisaun parlamentár. Objetivu serimónia agradesimentu ne’e ami hakarak agradese ba ita-nia autoridade sira tanba eleisaun ne’ebé foin lalais liu ne’e, ema hotu-hotu ninia kontribuisaun no partisipasaun liuliu parte seguransa ninia apoiu durante ne’e hodi asegura seguransa iha munisípiu Viqueque,” Humberto Fernandes hateten ba jornalista sira iha salaun adiministrasaun.
Nia hatutan, STAE Viqueque hato’o agradesimentu ba diretór munisípiu no diretór liña ministeriál sira-ne’ebé fó apoia tomak transporte hodi fasilita tula materiál eleisaun parlamentár ba sentru no estasaun votasaun sira.
“Ami mós agradese ba fikál partidu polítiku sira-ne’ebé mak serbisu hamutuk ho STAE, ne’ebé fó susesu ba eleisaun parlamentár iha munisípiu Viqueque,” nia dehan.
Iha fatin hanesan sekretáriu munisípiu Viqueque, Teotonio da Silva Sarmento, hato’o agradesimentu ba populasaun munisípiu Viqueque tanba hamutuk konsege partisipa prosesu eleisaun ne’ebé la’o ho susesu iha munisípiu Viqueque.
“Ha’u mós husu agradese ba STAE munisípiu Viqueque ne’ebé organiza no Komisaun Nasionál Eleisaun (CNE-sigla portugés) superviziona ba eleisaun parlamentár ne’ebé ita la’o ho di’ak. Eleisaun parlamentár ne’e ita hili foun ita-nia parlamentu no Governu foun, tanba ne’e liuhosi eleisaun mak ita bele determina,” nia dehan.
Tuir dadús, STAE Viqueque distribui sertifikadu ba brigadista ho totál hamutuk na’in-112 no ofisiál eleitorál totál hamutuk na’in-1.350.
Jornalista : Vitorino Lopes da Costa
Editór : Cancio Ximenes
