iklan

HEADLINE, SOSIEDADE SIVĺL

ADN, I.P konklui ona verifikasaun ba igreja Ai-mutin

ADN, I.P konklui ona verifikasaun ba igreja Ai-mutin

Konstrusaun Igreja Ai-Mutin. Imajen Tatoli/Francisco Sony

DILI, 26 juñu 2023 (TATOLI)—Ekipa responsável hosi Ajénsia Dezenvolvimentu Nasionál, Institutu Públiku (ADN, I.P) konklui ona verifikasaun  ba igreja Ai-mutin, maibé daudaun ne’e konstrusaun seidauk ramata tanba presiza osan adisionál.

“Konstrusaun igreja Aimutin kleur loos, tuir informasaun ne’ebé ha’u hetan, fundu ne’ebé apoiu hosi Governu fó tiha ona no ita halo ona verifikasaun maibé konstrusaun ba igreja presiza osan boot liu fundu ne’ebé Governu aloka, ho ida-ne’e konstrusaun daudaun ne’e paradu,” Diretór Ezekutivu ADN, I.P, Mariano Renato Monteiro da Cruz, informa ba Agência Tatoli, iha ninia knaar fatin, Caicoli, segunda ne’e.

Antes ne’e, Governu fó apoia millaun $2 iha tinan 2021 ba konstrusaun no ADN, I.P tinan ne’e halo kompletu verifikasaun ho prosesu implementasaun osan ne’ebé prevee, maibé konstrusaun paradu tanba presiza kustu totál millaun $5, tanba ne’e agora parte igreja rasik tenke buka fundu atu finaliza.

Notísia relevante : Dom Vírgilio husu SASCAS no ADN fiskaliza progresu konstrusaun Igreja Aimutin

Antes ne’e, Diretór Ezekutivu Servisu Apoiu Sosiedade Sivil no Auditoria Sosial iha Gabinete Primeiru-Ministru (SASCAS-PM, sigla portugés), Edvin Soares Noronha, hateten, progresu konstrusaun fíziku igreja Ai-mutin atinje ona 83,5%.

Igreja hetan apoiu orsamentu hosi SASCAS, ne’ebé ikus liu apoia tinan 2021 ho montante $4.000 hodi kompleta orsamentu ne’ebé Governu fó ba parte igreja ho montante millaun $3.

“SASCAS labele apoiu tanba durante ne’e laiha orsamentu espesífiku ba ida-ne’e no Governu Timor-Leste no Santa Sé liuhosi Konferénsia Episkopal Timorense (CET, sigla portugés) asina ona akordu katak osan ne’ebé Governu apoia ba igreja sei jere hosi CET. Ita ko’alia projetu konstrusaun igreja Ai-mutin ne’e na’in mak igreja Katolika tanba iha akordu ida entre Governu Timor-Leste ho Santa Sé liuhosi CET hateten momós katak orsamentu ne’ebé Governu apoiu ba igreja ne’e sei jere hosi CET, entaun ba oin ita laiha tan apoiu orsamentu ruma ba projetu tanba sei kabe ba sira,” nia dehan.

SASCAS rasik laiha aprovizionamentu direita ba projetu sira tanba sira-nia knaar ida mak jere orsamentu Governu hodi fó apoiu orsamentu ba sosiedade sivíl inklui subvensaun ba relijiozu sira.

“Tanba ne’e mak ami fó apoiu ba igreja, maibé la halo aprovizionamentu ba projetu sira, tanba subvensaun públika ami jere liuhosi servisu halo parseiru ho parokia sira, entaun parókia mak halo nia aprovizionamentu. SASCAS laiha osan atu tau-matan ba sasán sira ne’e tanba na’in mak igreja Katolika liuhosi CET,” Diretór tenik.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!