Kondisaun estrada ligasaun Ulussu-Uatolari difikulta movimentu transporte
VIQUEQUE, 26 juñu 2023 (TATOLI)—Kondisaun estrada ligasaun aldeia Ulussu, suku Matahoi bá postu administrativu Uatolari, munisípiu Viqueque ladún di’ak, nune’e difikulta movimentu transporte no abitante hala’o atividade.
“Triste tebes ho kondisaun estrada aldeia Ulussu, iha tempu udan abitante sira labele halo movimentu bá postu ka mai aldeia. Foin lalais ha’u orienta abitante lokál kehe estrada sira ne’e, nune’e durante semana ida resin maka estrada sira foin di’ak hodi karreta no motorizada sira bele halo movimentu. Aleinde ne’e estrada hosi Ulussu liga bá Quelicai mós ho kondisaun a’at,” Xefe suku Matahoi, Antonio Amaral, informa iha aldeia Ulussu, segunda ne’e.
Notísia relevante : Empreza COVEG hahú normaliza estrada Lugatohi Viqueque
Nune’e, Autoridade lokál ne’e husu ba ministériu relevante atu tau-matan ba kondisaun estrada liga bá área rurál sira iha Viqueque.
“Presiza tau-matan ba estrada hodi ambulánsia hosi postu saúde Ulussu bele transporta pasiente bá sentru saúde no agrikultór bele lori produtu lokál ba merkadu. Ha’u hato’o beibeik proposta ba munisípiu no Ministériu Obra Públiku (MOP) kona-ba estrada ne’e maibé laiha resposta ruma ba ami-nia pedidu. Ami-nia esperansa ba Governu foun bele rezolve dalan ne’ebé liga bá área rurál,” nia akresenta.
Xefe suku ne’e haktuir, iha tinan 2007, inan-isin rua ida lakon vida bainhira atu partu tanba kondisaun estrada a’at halo ambulánsia labele transporta bá sentru saúde Uatolari, aleinde ne’e iha katuas ida moras, família sira hulan bá sentru saúde Uatolari maibé la to’o fatin iis kotu, nune’e família sira lori filafali ba rezidénsia.
Iha fatin hanesan, abitante aldeia Ulussu, Paulino Freitas Menezes, sente triste haree kondisaun estrada liga bá aldeia tanba fó impaktu ba abitante sira.
“Ho kondisaun estrada a’at, bainhira ami moras iha ne’e ambulánsia sira labele to’o ami-nia fatin, nune’e ami tenke hulan. Ami-nia produtu lokál barak hanesan bua, kulu, kamí no nuu maibé ami labele lori ba fa’an iha merkadu hodi hetan osan ruma, ida-ne’e halo ami sente triste,” nia tenik.
Estrada ligasaun aldeia Ulussu bá postu Uatolari ho distánsia kilómentru 27, asesu hosi abitante suku Uaitame, Macadique no suku Matahoi ne’ebé hela iha área rurál.
Tuir dadus, totál populasaun iha aldeia Ulussu hamutuk 285 hosi uma-kain 84.
Jornalista : Vitorino Lopes da Costa
Editora : Julia Chatarina
