DILI, 26 juñu 2023 (TATOLI) – Diretóra Nasionál Patrimóniu Dezenvolvimentu Infraestrutura Sekretariu Estadu Juventude no Desportu (SEJD), Maria Luisa Monteiro informa, konstrusaun ba kampu multifunsauan Taibesi daudaun ne’e sei paradu provizóriu tanba kontratu ho kompaña remata ona iha fulan kotuk.
“Kampu Taibesi iha 31 maiu liubá kontratu SEJD ho kompaña termina ona, ita labele kontinua lai, tuir lei depois Eleisaun Sekretáriu Estadu ida agora nia mandatu atu remata ona labele asina dokumentu balun ligasaun ho orsamentu boot, ho nune’e hein fali governu foun mai mak prosesa fila fali kontratu maibé depende ba desizaun,” Diretora ne’e ba Agência TATOLI, iha edifisiu SEJD Lecidere Dili, segunda ne’e.
Tuir ezekutiva ne’e katak, progresu daudaun ne’e atinje ona 40.97% no ekipa tékniku sei halo verifikasaun bainhira atinje ona pursentu ne’ebé iha hodi halo pagamentu no termina kontratu.
“Agora ita hein prosesu foun mai, atu hein desizaun loke fali prosesu ba públiku bele mós liuhosi prosesu kotasaun, mak ita hein prosesu foun,” Diretora ne’e esplika.
Kompaña ne’ebé kaer obra ne’e SEJD notifika ona iha semana kotuk husu atu labele hala’o atividade servisu temporariamente ba projetu ne’e.
“Buat hotu depende ba desizaun, se Governu foun mai haree ba nia prosesu la’o neneik liu, mak hakarak loke prosesu foun ba kompaña seluk ne’e desizaun iha Governasaun foun,” nia hakotu.
Konstrusaun ba kampu ne’e SEJD lansa fatuk da-uluk iha loron 22 outubru tinan kotuk no agora besik ona tinan rua seidauk finaliza, tanba tuir kontratu sei finaliza iha abril 2022, maibé la konsege.
Ho nune’e Governu liuhosi SEJD kontinua hanaruk tan kontratu fulan neen tan atu bele konklui projetu ne’e maibé kontratu termina ona iha fulan maiu ne’e maibé projetu seidauk konklui.
Konstrusaun kampu multifunsaun ho objetivu atu joven-sira bele espresa talentu no prátika desportu hanesan futebol, basketbol no voleiból.
Projetu ne’e ezekuta hosi kompañia Uka Unipesoal Lda ho orsamentu $210,159.18 no durasaun fulan-neen.
Jornalista : Hortencio Sanchez
Editór : Rafael Ximenes de A. Belo
