DILI, 26 juñu 2023 (TATOLI) – Ministériu Edukasaun, Juventude no Desportu entrega ona edifísiu foun rua ba dirijente Eskola Sekundária Jerál 12 Novembru Becora atu utiliza ba prosesu aprendizajen. Estabelesimentu eskolár ne’e tama iha Projetu Konstrusaun no Reabilitasaun Infraestrutura Edukativa (PKRIE).
Ministru Edukasaun, Juventude no Desportu, Armindo Maia, husu ba dirijente eskola no estudante sira atu uza infraestrutura foun ne’e ho responsabilidade, tanba apoiu ne’ebé Governu fó ona bá eskola ne’e atu tulun prosesu aprendizajen ida adekuada ba alunu sira.
“Ohin, ami mai entrega eskola ne’e ba ita-boot sira atu uza ho didi’ak, tanba eskola ne’ebé Governu kria ne’e uza osan povu nian”, Ministru Armindo Maia hatete, ohin.
Konstrusaun edifísiu rua ho sala aula neen ne’e ninia durasaun tempu loloos ne’e fulan neen de’it, maibé tanba iha difikuldade entaun foin maka bele entrega ba parte eskola. Maski obra ne’e tarde, maibé nafatin garante nia kualidade no bainhira entrega ona ba eskola labele mosu problema ruma.
“Ita hakarak garante kualidade ida di’ak liu ba estudante sira, liuliu ba eskola ne’e tanba nia sai referénsia boot ida ne’ebé iha tempu okupasaun Indonézia sai eskola ne’ebé iha duni kualidade”, nia relembra.
Diretór Nasional Dezenvolvimentu Parke Eskolár, Agostinho Soares, dehan eskola ne’e tama ona iha inaugurasaun faze daruak, agora MEJD realiza de’it serimónia atu entrega xave ba parte eskola hodi bele uza ba sira-nia atividade. Eskola ne’e finaliza ho orsamentu hamutuk $132.376.67.
Xefe Gabiente Apoiu Tékniku, Kanisius Elo, garante katak sei jere edifísiu rua ne’e ho didi’ak no sei kria kondisaun ida atu lori nafatin ambiente ida mós ba eskola ne’e, tanba eskola ne’e rasik ministériu konstroi ho osan povu nian.
Jornalista: Tomé Amado
Editora: Maria Auxiliadora
