DILI, 26 juñu 2023 (TATOLI)—Adjunta Xefe Kasa Sivíl Prezidénsia Repúblika, Hendriqueta Maria da Silva, informa, Prezidete Repúblika, José Ramos Horta, hakarak povu partisipa iha serimónia tomada pose ba membru IX Governu, ne’ebé hala’o iha areadór Palásiu Prezidénsiál, Bairru Pité, iha loron sábadu (01/07).
“Prezidénsia, liu-liu Prezidente Repúblika hanoin katak pose ida agora-ne’e, pose ba Governu ida-ne’ebé respeita tebes povu nia lian, tanba povu mak hili partidu ne’ebé manán maioria simples iha eleisaun ho kadeira lubuk ida no koliga hodi forma Governu. Entaun hakarak fó mós onra ba povu, tanba ne’e maka realiza eventu ne’e iha li’ur para bele iha mós partisipasaun povu nian,” Hendriqueta Maria da Silva hateten ba jornalista sira iha Palásiu Prezidénsiál, Bairru Pité, segunda ne’e.
Notísia relevante : Maioria kuadru partidu CNRT konkorda koliga ho PD forma IX Governu
Koordenadora Jerál komisaun dehan, eventu ne’e realiza iha areadór palásiu nian ho hanoin ida katak, povu bele sente katak IX Governu sei sai Governu ne’ebé serbí ba povu no Estadu.
“Tanba ne’e maka eventu ne’e fó mós espasu ba povu atu mai asiste, konserteza katak iha regra balun ne’ebé aplika durante eventu Estadu ne’e la’o tanba konvida mós bainaka espesiál sira, maibé nafatin mobiliza populasaun hodi partisipa,” nia akresenta.
Ba kestaun ne’e, Komisaun koko atu halo poupansa tanba iha konvidadu barak.
“Ha’u seidauk iha númeru serteza ba konvidadu tanba proposta lubuk ida, ami sei halo konta ida didi’ak para integra proposta sira ne’e hotu, tenta atu minimiza, Prezidente Repúblika mós envolve iha prosesu tanba nia mai ho intensaun ida katak, iha poupansa ba orsamentu Estadu,” nia argumenta.
Serimónia tomada pose ba membru Governu foun sei hahú ho sesaun solene no posível sei aprezenta video ‘povu nia lian’ no ikus liu iha sesaun divertimentu hamutuk ho povu.
“Preparasaun ba fatin daudaun atinje ona 75%,” Hendriqueta Maria konklui.
Jornalista : Antónia Gusmão
Editora : Julia Chatarina
