iklan

INTERNASIONÁL, SEGURANSA

UPM konsege salva sidadaun Indonézia na’in-rua iha tasi-klaran

UPM konsege salva sidadaun Indonézia na’in-rua iha tasi-klaran

UPM halo patrullamentu iha tasi. Imajen/Google

DILI, 26 juñu 2023 (TATOLI)- Komandante Unidade Polísia Marítima (UPM), Superintendente Polísia Eúgenio Pereira, informa ekipa UPM konsege salva sidadaun estranjeiru hosi nasaun Indonézia nain-rua, bainhira ho ró atu fila ba iha illa Alór Indonézia.

Kazu ne’e akontese iha 24 juñu 2023, bainhira sidadaun Indonézia na’in-rua ne’e ho ró “Bus Dolar” hosi hosi Alor mai Timor atu hatun ikan tanba durante ne’e servisu hamutuk ho empreza Timor-oan sira.

Bainhira sidadaun indonésiu hirak hatún tiha ikan iha Díli, loron 25 juñu iha tuku 15:00 loraik, no fila kedan ba Alor Indonézia. Maibé durante sira nia viajen hetan problema iha tasi klaran besik Cristo Rei nian tanba ró ne’ebé sira uza mákina rua avaria.

Nune’e, sidadaun sira ne’e hela de’it iha  tasi-klaran no sira informa ba Timor-oan ida ne’ebé servisu hamutuk ho sira kona-ba situasaun ne’e, nune’e iha 25  juñu 2023, iha  tuku  19:00, kalan, UPM halo kedan intervensaun hodi salva sidadaun sira ne’e.

“Ita nian membru sira foti medida hodi halo salvamentu ba sidadaun sira ne’e, ita hetan sira que grave liu, maibé grasa deus, ita konsege salva sira no ita lori sira mai fali iha rai maran, hodi lori sira ba fali iha kuartél polísia UPM,” informa Komandante UPM ne’e, iha Sentru Formasaun Polísia (CFP, sigla Portugés) Comoro, segunda ne’e.

Daudaun ne’e, Komandante UPM informa, sidadaun Indonézia nain-rua ne’e submete ona ba prosesu identifikasaun atu buka hatene kauza tanba saida mak akontese problema liuliu mákina ró avaria. Nune’e bele hadia fali ró ne’e atu sir abele viajen ba fali sira nia rain.

“Ohin, ita nian pesoál UPM sira halo hela identifikasaun ba sira, parese hadi’a tiha mákina ne’e atu aban ka bain rua sira sei viajen ba fali Alor”, nia garante.

Jornalista: Natalino Costa

Editór     : Florencio Miranda Ximenes

iklan
iklan

Leave a Reply

iklan
error: Content is protected !!