AILEU, 27 juñu 2023 (TATOLI) – Governu Konstitusionál da-ualu liuhosi Ministériu Obras Públika (MOP) Abel Pires hamutuk ho Ministru Edukasaun, Juventude no Desportu (MEJD) Armindo Maia hamutuk ho autoridade Munisípiu Aileu no komunidade lansa fatuk dahuluk ba konstrussun estrada ligasaun Aileu Vila to’o Postu Administrativu Lequidoe liu ba Remexio.
“Lansamentu ida ne’e atu kompaña bele halo ona servisu, ita mós hetan ona vistu hosi câmara de contas sertifika ona laiha problema, hetan ona supervizaun hosi Ajénsia Dezenvolvimentu Nasionál (ADN), buat hotu loos ona mak lansa ona estrada ne’e para komesa halo ona servisu,” Ministru MOP iha nia intervensaun bainhira lansa estrada ne’e iha Aileu, tersa ne’e.
Nune’e nia husu ba komuniade hotu iha Aileu atu kolabora di’ak ho Governu no kompaña atu halo servisu ho di’ak tuir kontratu ne’ebé iha.
“Husu ba Aileu-oan hotu atu kontribui labele impede projetu ne’e, liuliu aman vetetanus sira, imi nia luta atu rai ne’e nia di’ak entaun kontribui ba atu halo dezenvolvimentu ba nasaun ida ne’e tuir ita hotu nia mehi,” ministru ne’e dehan.
Nia mós fiar iha Governu foun mai sei kontinua saida mak nia halo hela tanba ema hotu hakarak halo buat di’ak ba nasaun ne’e.
“Ministru se mak atu mai troka ha’u sei kontinua saida mak ha’u halo ona, tanba ita hotu hakarak nasaun ne’e tenke dezenvolve ba oin,” nia otimista.
Administradór Munisípiu Aileu Abel da Conceição husu ba povu hotu atu fó orgullu ba Governu daualu ne’ebé lidera hosi Primeiru Ministru Taur Matan Ruak tanba mandatu besik termina ona maibé konsege lansa konstrusaun estrada ne’e.
“Estrada ligasaun ba Lequidoe no Remexio agora lansa ona, la kle’ur tan ita bele asesu ona dalan ne’ebé di’ak, tinan barak ita-nia dalan ne’e kondisaun aat tebes, maibé ohin lansa ona fatuk dahuluk fiar katak tempu besik ita sei hetan ona estrada foun, ita agradese ba VIII Governu ida ne’e, maske mandatu besik remata ona maibé sei halo nafatin buat ruma ba povu ida ne’e,” Administradór ne’e agradese.
Tuir autoridade másima munisípiu Aileu ne’e, hahú Timor-Leste independénsia to’o ohin loron Aileu foin mak hetan konstrusaun estrada ligasaun hosi Postu ba Postu ho kilometru ne’ebé naruk.
Ho nune’e, nia husu ba komuniade sira hotu atu kolabora ho kompaña atu kaer obra ne’e to’o finaliza nune’e bele fasilita povu sira bele lori produtu mai fa’an iha kapitál Munisípiu no lori ba Dili.
“Projetu ne’e na’in mak Governu, karik iha problema ruma iha dalan kona-ba ita-boot sira-nia ai-horis ruma labele halo problema ho kompaña maibé hakbesik aan mai Administrasaun Munisípiu no Postu, tanba kompaña hanesan parseiru ho Governu atu finaliza projetu ne’e,” nia hakotu.
Konstrusaun ne’e konstroi hosi kompaña internasionál China Overseas Engineering Group Co. Ltd (COVET) ho totál orasamentu hamutuk $24,235,453.31 ho nia durasaun kontratu fulan 18.
Estrada ne’e konstroi ho nia kilometru hamutuk 27-resin utiliza orasamentu hosi fundu infraestrutura.
Jornalista: Hortencio Sanchez
Editór: Rafael Ximenes de A. Belo
