DILI, 27 juñu 2023 (TATOLI) – Ministru Edukasaun, Juventude no Desportu (MEJD), Armindo Maia, lansa, ohin, fatuk dahuluk ba konstrusaun eskola CAFE ho andar ida iha rai ektare tolu ne’ebé lokaliza iha munisípiu Aileu ho orsamentu rihun $640.
Diretór Nasionál Dezenvolvimentu Parke Eskolár (DNDPE), Agostinho Soares, informa katak autoridade munisipál Aileu entrega, iha fulan tolu liubá, rai ba ministériu atu halo konstrusaun eskola CAFE.
Lansamentu fatuk dahuluk ba eskola CAFE ne’e realiza, tanba dezeñu no planta (BoQ) ba obra eskola ne’e preparadu ona, nune’e Ministru Edukasaun planeia atu aselera tiha prosesu lansamentu ne’e no bainhira Governu foun mai bele kontinua de’it ona.
Konstrusaun edifísiu eskola CAFE ho andár ida ne’e kompostu husi sala aula 12, kazerna tolu ba profesór sira, eskritóriu ba manorin no biblioteka ida. Verba ba obra eskola ne’e tama iha kapitál dezenvolvimentu no sei konstroi ho pakote.
“Projetu konstrusaun ne’e komunidade sira disponibiliza atu konstroi ka instala eskola CAFE, entaun Ministériu Edukasaun, liuhusi DNDPE termina ona ninia durasaun tempu tinan ida sura husi loron ne’ebé halo lansamentu fatuk dahuluk, maibé konstrusaun ne’e bele estende ninia durasaun tempu kuandu hasoru difikuldade ruma iha prosesu konstrusaun ne’e”, Agostinho Soares afirma ba Tatoli, iha Bekora.
CAFE mak projetu kooperasaun bilaterál estabelesidu liuhusi protokolu kooperasaun ida entre Portugál no Timor-Leste, asinadu iha dezembru 2014 no iha adenda estensaun temporál iha janeiru de 2020.
Projetu ne’e ho objetivu ba melloria kualidade sistema edukativu timorense, liuhusi lesionasaun iha língua portugeza no husi formasaun profesór timoroan sira.
Jornalista: Tomé Amado
Editora: Maria Auxiliadora
