PN simu ona karta ofisiál kompozisaun bankada parlamentár

June 27, 2023
04:07 PM
Facebook Instagram X WhatsApp Telegram

Kompozisaun legislatura daneen (PN) ne’ebé lidera hosi Prezidente Parlamentu Nasionál, Maria Fernanda Lay, hafoin hala’o eleisaun hodi kompleta meja parlamentu nasionál ne’ebé domina hosi feto, segunda (26 junu 2023). Imajen Tatoli/António Daciparu.

DILI, 27 juñu 2023 (TATOLI)—Sekretária Meza Parlamentu Nasionál, Virginia Ana Belo, hateten meza PN simu ona karta ofisiál kompozisaun bankada parlamentár iha lejislatura daneen, hosi Congresso Naçional da Reconstrução Timorense (CNRT), Frente Revolsionáriu Timor-Leste Indepedente (FRETILIN), Partidu Demokrátiku (PD), Kmanek Haburas Unidade Nasionál Timor Oan no Partidu Libertasaun Populár (PLP).

“Parlamentu Nasionál iha ona dirijente bankada parlamentár ba próximu tinan lima,” Sekretária Meza PN ne’e fó sai liuhosi reuniaun plenária, tersa ne’e.

Nune’e, xefe bankada partidu CNRT mak Duarte Nunes ho nia vise-primeiru no segundu, Patrocínio Fernandes ho Lucia Taeki.

Xefe bankada partidu FRETILIN, Aniceto Longuinhos Guterres Lopes, ho nia vise-primeiru no segundu David Dias Ximenes ‘Mandati’ ho Maria Angelica Rangel.

Xefe bankada PD, António da Conceição ‘Kalohan’, ho nia vise Sancha Margarida Tilman.

Xefe bankada KHUNTO, Olinda Guterres, ho nia vise-primeiru no segundu António Verdiál de Sousa ho António Ferreira.

Xefe bankada PLP, Maria Angelina Sarmento, ho nia vise-primeiru no segundu Helder Freitas no Abel dos Santos.

Tuir Rejimentu Parlamentu Nasionál (RPN) iha artigu 11 (Konstituisaun no Organizasaun) ne’ebé iha alínea 2 hateten, atu konstituisaun bankada parlamentár ida-idak tenke hato’o komunikasaun eskrita ba Prezidente Parlamentu Nasionál, ne’ebé asina hosi Deputadu sia-ne’ebé hola parte no indika bankada nia Prezidente no Vise Prezidente, karik iha.

Iha alínea 3 haktuir, kualkér alterasaun iha kompozisaun bankada nian tenke fó hatene ba Prezidente Parlamentu.

Alínea 4 hateten, funsaun prezidente, vise-prezidente ka membru meza nian inkompatível ho funsaun prezidente bankada parlamentár nian.

Iha alíenea 5 dehan, bainhira bele, sei fó ba bankada parlamentár sira apoiu ne’ebé presiza tebes, hanesan gabinete traballu.

Iha lejislatura daneen ne’e partidu lima mak hetan asentu parlamentár hanesan CNRT ho kadeira 31, FRETILIN kadeira 19, PD kadeira neen (6), KHUNTO kadeira lima (5) no PLP ho kadeira ha’at (4)

Jornalista : Nelson de Sousa

Editór : Cancio Ximenes