DILI, 27 juñu 2023 (TATOLI)— Komandu Polisia Nasionál Timor-Leste (PNTL), tersa ne’e, hala’o enkontru ho adidu seguransa Embaixada ne’ebé rezidente iha Timor-Leste, hodi atualiza situasaun seguransa iha Timor-Leste.
Komandu PNTL realiza enkontru ne’e basea ba pedidu hosi Embaixadór sira ne’ebé daudaun rezidente iha Timor-Leste hodi bele hatene situasaun seguransa jerál iha Timor-Leste.
“Ita realiza enkontru ida ho ita-nian adidu seguransa ne’ebé mak iha territóriu Timor-Leste, hodi partilla informasaun kona- ba situasaun seguransa jerál iha Timor-Leste ba sira atu hatene,” hatete Komandante Operasaun Nasionál, Superintendente Xefe José Soares hateten ba jornalista sira hafoin enkontru ho adidu seguransa sira iha Komandu Jerál PNTL tersa ohin.
Tuir nian loloos enkontru ne’e realiza ona, molok kampaña eleitorál, maibé tanba Komandu PNTL okupadu ho ajenda kampaña no eleisaun nian entaun la konsege. Nune’e realiza fali hafoiin eventu festa demókrasia.
Iha enkontru ne’e, PNTL atualiza ba adidu seguransa sira ne’ebé rezidente iha Timor kona-ba komparasaun situasaun seguransa iha prosesu eleitórál iha tinan sira liu ba ne’e no estátistika krime iha territóriu laran situasaun la’o hakmatek.
“Situasaun la’o di’ak no buat hotu la’o di’ak laiha buat ruma akontese,” hateten Komandante José.
Biban ne’e, adidu seguransa sira ne’ebé rezidente iha Timor-Leste fó apresiasaun ba PNTL tanba konsege asegura situasaun jerál iha Timor-Leste ho hakmatek.
Jornalista: Natalino Costa
Editór : Florencio Miranda Ximenes
