Edukasaun Covalima hein desizaun profesór 45 asina kontratu hosi MEJD

COVALIMA, 28 juñu 2023 (TATOLI)–Xefe Departamentu Parke Eskolár Covalima, Manuel França, hateten Servisu Edukasaun Covalima sei hein desizaun kona-ba profesór nain-45 atu asina-sira nia kontratu hosi Ministériu Edukasun Juventude no Desportu (MEJD).

“Foin lalais halo verifikasaun karta reklamasaun ne’ebé submete hosi professor sira, nune’e profesór na’in-45 seidauk asina kontratu ba faze daruak, maibé hein de’it hosi Ministériu Edukasaun Juventude no Desportu (MEJD,” Manuel França hateten ba Agência Tatoli, iha resintu Ensinu Eskola Sekundáriu Jerál Públiku Suai, tersa ne’e.

Hafoin Governu fó sai lista profesór sira atu asina kontratu ne’ebé tuir dadus ba etapa dahuluk, profesór nain-94 ne’ebé asina ona kontratu, aleinde ne’e Servisu Edukasaun Covalima simu karta reklamasaun hosi profesór-sira.

Servisu edukasaun simu reklamasaun hosi profesór sira hanesan reklama profesór hanorin iha tempu kle’ur no rekruta profesór tuir dixiplina.

Ho nune’e, bazeia ba prosesu verifikasaun hosi karta reklamasaun ne’ebé professor sira nain-200-resin submete ba servisu edukasaun Covalima, iha prosesu verifikasaun identifika profesór nain-45 sei asina sira-nia kontratu.

 “Ba etapa dahuluk ne’ebé profesór-sira iha sai hosi nasionál mai iha Covalima 274 hosi na’in-tolu (3) rezigna-aan, nune’e públika iha jornál profesór na’in-94 ne’ebé asina ona sira-nia kontratu. Ba faze daruak, seidauk asina kontratu nune’e iha hela MEJD, hein prosesu oinsá ami hein de’it,” nia hateten.

Antes ne’e,02 fulan-marsu tinan 2023, eis Diretór Servisu Munisipál Edukasaun Covalima, Rui Amarál Suri Seran, hateten Edukasan Covalima simu dokumentu hosi profesór na’in-204 ne’ebé hato’o karta reklamasaun.

Jornalista : Celestina Teles

Editór       : Cancio Ximenes