DILI, 28 juñu 2023 (TATOLI)—Inspesaun Jerál Jogu (IGJ, sigla portugés) iha Ministériu Turizmu Komérsiu no Indústria (MTKI) kuaze konklui ona levantamentu dadus ba fatin jogu tradisionál futu manu estabelesidu tanba iha planu ona atu legaliza iha futuru.
Inspetór Jerál Jogu, Domingos da Costa Guterres, hateten, inisiativa atu legaliza jogu futu manu ne’e loloos hafoin Eleisaun Parlamentár, maibé tanba levantamentu dadus sei la’o hela, nune’e hein Governu foun mai mak IGJ tau ba rekomendasaun.
“Ita-nia ekipa halo hela levantamentu dadus ba fatin sira ne’ebé mak operadór sira hala’o jogu no serbisu koordena ho operadór sira atinje ona 70%, entaun ita hein Governu foun mak legaliza tanba ita sei prepara didi’ak lai asuntu ne’e,” Inspetór Jerál Jogu informa ba Agência Tatoli, iha ninia knaar fatin, Bebora, kuarta ne’e.
Notísia relevante : Governu sei legaliza jogu tradisionál ‘futu manu’ iha tempu badak
Nia dehan, durante sira halo diskusaun ho koordenadór operadór sira, ne’ebé deside iha Dili mak sai nu’udar pilotu dahuluk ba jogu futu manu hafoin ba munisípiu sira, maibé sei hatuur kondiasaun no regra sira atu asesu.
“Jogu futu manu ne’e presiza legaliza tiha tanba daudaun ne’e seidauk legaliza mós komunidade kontinua la’o ona, tanba ida-ne’e jogu ne’ebé desde tempu bei-ala sira to’o mai agora,” nia akresenta.
Tuir Inspetór presiza legaliza jogu ne’e hodi bele hetan kontrolu hosi Governu, maibé molok ne’e presiza haree kondisaun hotu hanesan labele envolve labarik iha jogu, fatin tenke dook hosi estrada públiku, kondisaun estasionamentu tenke di’ak nune’e lebele perturba fali movimentu transporte públiku.
Jornalista : Arminda Fonseca
Editora : Julia Chatarina
