DILI, 28 juñu 2023 (TATOLI) – Komandante Polísia Nasionál Timor-Leste (PNTL) Munisípiu Díli, Superintendente Xefe Polísia Natercia Martins, sei konvoka enkontru ho lider komunitária sira iha Díli atu buka hatene no fó solusaun ba problema tuda malu iha entre joven sira iha kapital.
“Agora ita haree problema tuda entre joven sira iha bairro iha kalan komesa fila fali, tanba ne’e mak iha tempu badak ha’u sei bolu fila fali lider komunitária sira, lider organizasaun arte marsiál sira atu tur hamutuk hodi haree problema sira ne’e nia fukun ne’e saida, para ita bele rezolve, nune’e labele mosu tán provokasaun entre joven sira tula malu iha tempu kalan”, Superintendente Xefe Polísia Natercia Martins hateten ba jornalista sira iha Komandu PNTL Caicoli, kuarta ne’e.
Nia dehan, Díli nudar sentru ba atividade ekonómiku no fatin buka matenek, la’os atu sai fatin ba konflitu.
“Joven sira mai iha Díli atu mai eskola, buka matenek, la’os fatin ba komflitu, tempu agora la’os ona atu problema maibé oinsá buka eskola no halo negósiu hodi sustenta ita vida no família nia nesesidade”, Natercia dehan.
Natercia apela ba sidadaun sira liuliu joven sira hodi hapara ona tuda malu iha tempu kalan no kontribui ba estabilidade nasionál. Tanba hanesan joven futuru sei naruk presiza hanoin ba futuru hodi kontribui ba prosesu dezenvolvimentu nasionál.
“Husu ba ita hotu atu koopera, kria pás no estabilidade, labele pertuba orden públiku iha tempu kalan, kuandu mosu nune’e, polísia nafatin halo nia kna’ar tuir lei hodi halo atuasaun”, nia konklui.
Jornalista: Natalino Costa
Editór : Zezito Silva
