PPN-Enkarregadu Embaixada Xina diskute relasaun bilaterál
DILI, 28 juñu 2023 (TATOLI)—Prezidente Parlamentu Nasionál (PPN), Maria Fernanda Lay, kuarta ne’e, simu audénsia hosi Enkarregadu Embaixada Xina iha Timor-Leste, Xu Danyang, hodi diskute kona-ba relasaun bilaterál entre nasaun rua.
“Ha’u foin mak iha sorumutu ida ho Prezidente Parlamentu foun, durante ami-nia enkontru, Prezidente Parlamentu foun fó ninia foku espesiál ba relasaun bilaterál entre TL no Xina,” Enkarregadu Embaixada Xina iha Timor-Leste, Xu Danyang, hateten ba jornalista sira hafoin ramata enkontru iha PN.
Xina no TL ninia kooperasaun bilaterál sólidu tebes no Xina mós fó apoiu ba dezenvolvimentu nasionál Timor-Leste dezde hosi restaurasaun independénsia 20 maiu 2002.
Nia dehan, durante sorumutu Prezidente PN mós informa ba nia-parte katak Timor-Leste ninia Governu foun sei mai, tanba ne’e mak Xina atu fó asisténsia ba TL iha área partikulár ruma ne’ebé mak bele atrai investidór mai Timor-Leste.
“Prezidente Parlamentu mós ko’alia kona-ba planu atu kria zona espesial ekonomia, iha ne’ebé mak Xina bele fahe ninia esperiénsia no fó apoiu ba Timor-Leste liu-liu ba kriasaun zona espesiál ekonomia,” nia dehan.
Tanba ne’e, nia dehan, Xina sei oferese apoiu no serbisu hamutuk ho Governu Timor-Leste kona-ba harii zona espesiál ekonomia refere.
“Zona Espesiál Ekonomia sei kria kampu traballu ba foinsa’e timoroan barak, atu nune’e lalika ba buka serbisu iha rai-li’ur, maibé bele serbisu iha rai laran,” nia hateten.
Iha parte seluk, Enkarregadu Embaxada Xina iha TL ne’e hateten, Xina sei kontinua no firme apoia Timor-Leste ninia esforsu atu adere ba ASEAN.
“Xina ninia relasaun bilaterál ho nasaun membru ASEAN sira di’ak tebes. Ezemplu mak Xima harii dalan komboiu super speed iha Indonézia, ne’e ha’u hanoin Timor-Leste bele sai membru ASEAN iha future,” nia dehan.
Ho nune’e, Xina sei kontinua mantein relasaun di’ak no sai amigu di’ak ho Timor-Leste hodi lori moris di’ak ba povu Timor-Leste.
Jornalista : Nelson de Sousa
Editór : Cancio Ximenes
