DILI, 29 juñu 2023 (TATOLI) – Empreza telekomunikasaun Telkomcel oferese liña internét ho velosidade 4 MB ba Universidade da Paz (UNPAZ) hodi apoia biblioteka online ba estudante sira iha kampus ramu Liquiçá, Covalima no Rejiaun Administrativa Espesiál Oé-Cusse Ambeno (RAEOA).
“Apoiu ne’ebé maka Telkomcel fó ona mai ita ne’e maka liña internét no biblioteka online. Antes ne’e ita husu volume ne’e 6 MB, maibé sira aprova de’it 4MB. Agora ita-nian kampus ramu tolu ne’e uza hela”, Reitór UNPAZ, Adolmando Soares Amaral, informa ba Tatoli iha kampus Ai-mutin, kinta ne’e.
Liña internét ne’ebé oferese husi empreza telekomunikasaun Indonézia ne’e atu apoia prosesu aprendizajen iha kampus ramu tolu ne’e bele la’o, nune’e bele ajuda estudante sira akompaña dixiplina sira husi online.
“Ho volume internét ne’ebé ki’ik husu ba estudante no dosente sira atu uza liña ne’e tuir duni nesesidade ne’ebé iha, entaun tenke jere ho didi’ak atu labele uza fali ba buat seluk ne’ebé la importante”, nia afirma.
Nune’e, husi apoiu faze dahuluk nian ne’ebé realiza ona ho instalasaun liña internét iha kampus ramu tolu ne’e, UNPAZ no Telkomcel formaliza tan akordu atu halo formasaun hodi kapasita dosente sira iha tempu besik. Akordu ne’e realiza iha salaun Prof. Dr. Lucas da Costa, iha loron 28 juñu .
“Ita ho Telkomcel realiza tan akordu ida kona-ba dezenvolvimentu kapasidade (capacity building) kona-ba sistema finanseiru sira ba dosente no programa ne’ebé mak interesante tebes atu halo mak business center ba manorin sira”, reitór akresenta.
Programa formasaun ba dezenvolvimentu kapasidade dosente sira-nian iha área negósiu no sistema finanseiru ne’e sei halo de’it iha UNPAZ, signifika universidade sei prepara kondisaun hotu depois maka konvida sira mai fahe esperiénsia ba dosente sira.
“Universidade halo ida ne’e atu fasilita dosente sira labele halo tan serbisu dobru iha fatin seluk. Di’ak liu husik sira serbisu de’it iha ne’e, maibé ita kria negósiu ba sira, ita bolu business center”, esplika.
Serimónia asinatura akordu ne’e husi Reitór UNPAZ no reprezentante Telekomunikasi Indonesia Internasional, Dedy Edward.
Jornalista: Tomé Amado
Editora: Maria Auxiliadora
