DILI, 29 juñu 2023 (TATOLI) – Diretór Ezekutivu Hospitál Nasionál Guido Valadares (HNGV), Alito Soares rekoñese HNGV sei menus rekursu umanus no ekipamentu hodi garante funsionamentu ospitalár.
“Tinan 20 ona ita nafatin sei menus rekursu umanus no ekipamentus, tanba ne’e ba futuru presiza aumenta atu nune’e bele halo atendimentu ba ita-nia populasaun sira”, Alito Soares, hateten bainhira selebra aniversáriu HNGV ba dala 20 iha (HNGV), ohin.
Nia subliña, rekursu umanu liuliu espesialista sira kompara ho tinan 20 ba kotuk hamutuk 70-resin, husi ne’e maioria médiku jerál, entaun HNGV presiza espesializada sira iha área intervensaun nian.
“Ita-nia ekipa médika sira ne’ebé, ita kompara tinan 20 liubá, ita iha 70-resin, ne’e maioria médiku jerál hotu, ita presiza tan médiku espesializada sira ba área intervensaun nian, tanba ne’e ita haruka ona médiku hamutuk 11 ba kontinua estuda iha nasaun Fiji, para bele fila fali mai halo atendimentu di’ak ba ita-nia populasaun sira”, nia relata.
Nia dehan, HNGV nafatin enfrenta ekipamentu sira hanesan kama ne’ebé durante ne’e sai preokupasaun ba ema hotu, tanba ne’e, ba futuru sei hadia hodi halo atendimentu ne’ebé di’ak ba pasiente sira.
“Durante ne’e dezafiu bo’ot mak ba kama ne’ebé mak sai preokupasaun ba ita hotu, tanba ne’e ba futuru ita sei hadia di’ak liután hodi halo atendimentu ba pasiente sira”, nia revela.
Iha fatin hanesan, Ministra Saúde Odete Maria Freitas Belo, informa ho aniversáriu HNGV ba dala 20 buat barak ne’ebé HNGV halo ona no buat barak ne’ebé mak sei enfrenta problema, tanba ne’e ba futuru hadia di’ak liután atendimentu ba pasiente sira.
Jornalista : Felicidade Ximenes
Ediatór : Zezito Silva
