VIQUEQUE, 29 juñu 2023 (TATOLI)-–Irrigasaun Irabere ne’ebé kotu iha tersa (27/06) daudaun ne’e labele fornese bee ba natar ektare 70 iha suku Irabin De cima, postu Uatucarbau, munisípiu Viqueque.
Koordenadór Extensionista postu Uatucarbau, Cancio da Silva, hateten, irrigasaun kotu fó impaktu ba agrikutura iha Irabin de Cima. Hare kuda hotu ona, maibé ho kondisaun irrigasaun kotu, halo bee labele tama ba natar laran.
“Irrigasaun ne’e baku fila iha tersa ne’e, ne’ebé bee natar laran agora kuaze maran hotu. Karik labele normaliza lalais irrigasaun ne’e maka komunidade nia hare ne’ebé kuda bele mate tanba bee laiha. Enkuantu laiha tan irrigasaun seluk mak bele fornese bee, ami sei buka dalan oinsá bele rezolve lalais,” Koordenadór informa ba Agência Tatoli iha postu Uatucarbau, kinta ne’e.
Notísia relevante : MAP Viqueque husu hadi’a sistema irrigasaun hodi hasa’e produsaun
Nune’e, Extensionista Uatucarbau sei informa ba Servisu Agrikultura Viqueque hodi fó solusaun.
“Se la rezolve lalais agrikultór sira sei iziji ami tanba bee maka laiha hare bele mate hotu no agrikultór sira lakon sira-nia ai-hahan tanba tempu agora natar ba époka 2023. Dalan seluk mak eskavatór hodi hadi’a irrigasaun ne’ebé monu,” nia akresenta.
Suku lrabin de Cima kompostu hosi aldeia lima, ho totál populasaun 1.000 resin hosi uma-kain 573.
Jornalista : Vitorino Lopes da Costa
Editora : Julia Chatarina
