OÉ-CUSSE, 30 juñu 2022 (TATOLI) – Diresaun Rejionál Edukasaun Juventude no Desportu iha Rejiaun Administrativa Espesiál Oé-Cusse Ambeno (RAEOA), daudaun ne’e prepara ona mobiliáriu meja kadeira no kuadru hakerek hamutuk 2000-resin hodi distribui ba eskola sira iha territóriu Oé-Cusse.
“Hosi proposta ne’ebé ita propoin, kompañia mós konsege hola ona mobiliáriu sira-ne’e, neste mumentu mobiliáriu sira-ne’e iha ona armazein edukasaun, no parte Autoridade liuhosi Sekretária Rejionál ba Asuntu Edukasaun, ami identifika no halo ona termu entrega hosi kompañia ba Governu,” Diretór Edukasaun Oé-Cusse, Daniel Mauno, ko’alia iha Oé-Cusse, sesta ne’e.
Notísia relevante: Edukasaun Oé-Cusse la autoriza profesór voluntáriu hetan legalidade iha ensinu aprendizajen
Tuir planu, mobiliáriu hirak-ne’e Governu liuhosi Autoridade daudaun ne’e sei prosesa hela iha hela parte lojístika, prepara hela lista atu halo distribuisaun ba mobiliáriu 2000-resin atu fornese ba eskola hot-hotu.
“Ita-nia esforsu atu oinsá kadeira, meja no mobiliáriu seluk-tán, bele distribui ona ba eskola sira, nune’e ita-nia mininiza limitasaun materiál iha eskola hodi fasílita di’akliu-tán nesesidade servisu iha eskola,” nia katak.
Nia informa, materiál hirak-ne’e hanesan meja, kadeira, kuadru hakerek no ármariu, sei distribui ba ensinu hotu-hotu, pré-eskolár, ensinu báziku no ensinu sekundáriu jerál no tékniku vokasionál.
“Ita sei haree ida-ne’ebé maka bele persiza liu, ita sei fornese mós ármariu, maibé ita prioridade liu ba eskola sira-ne’ebé foin harii iha 2021 no 2022, tanba tanba sira seidauk iha mobiliáriu natón, maibé ita mós sei haree tán eskola sira-ne’ebé menus ita sei kompleta tán,”
Entretantu, kompañia Vitarly Unipesoál Lda, mak fornese ho valór kontratu hamutuk $249,890.96. hotál mobilíariu ne’ebé kompañia fornese hamutuk 2000-resin.
Notísia relevante: Edukasaun Oé-Cusse simu ona professór na’in-60 hosi KFP atu reforma
Jornalista: Abílio Elo Nini
Editór: Evaristo Soares Martins
