DILI, 30 juñu 2023 (TATOLI) — Diretór Ezekutivu Hospitál Nasionál Guido Valadares (HNGV), Alito Soares hateten ekipa espesializada iha Viqueque identifika tipu moras, hanesan estómagu, tensaun, pulmaun TB, moras ruin no moras kulit.
“Iha konsulta jerál ne’e, ekipa médika konsege indentifika moras lima mak aas iha Aldeia Ulu-Suu, Suku Matahoi, Postu Administrativu Uatulari, Munisípiu Viqueque no moras ne’ebé identifika mak estomuk, tensaun, pulmaun TB, moras ruin , moras kulit ne’ebe afeta ba ema kiik no mos ema boot”, nia dehan ba jornalista sira iha HNGV, ohin.
Nia esplika, durante loron tolu, hahú 26 to’o 28, totál pasiente ne’ebé mak médiku espesializada hetan hamutuk 851, husi númeru ne’e idantifika maioria mane, tuir fali mak inan feto sira.
“Husi númeru ne’e, ita bele fahe ba grupu bo’ot lima, husi ne’e barak liu mak estomuk, tensaun, infesaun baibain no infesaun liga ho tuberculose, kulit, katar no ikus liu moras ruin”, nia akresenta.
Husi númeru ne’e, ekipa sira identifika labarik na’in-haat mak sofre korasaun ne’ebé grave.
“Husi atividade kosulta, ema na’in 15 mak ita halo transferénsia mai iha HNGV para bele halo diagnóstiku klean liu hodi bele hetan tratamentu ne’ebé di’ak liután”, nia esplika.
Atividade ne’e, husi fundu globál mós apoiu hodi halo detesaun sedu liuliu ba raiu-x hodi deteta komunidade sira moras liga ho moras tuberkoloze nian.
“Ita-nia ekipa médika sira mós lori mákina EKG ne’ebé mak leno fuan hodi bele deteta moras fuan no ida seluk mak konsulta matan obrigatóriu, ema hotu konsulta matan atu halo detesaun ba problema matan, ita mós fahe óklu ba komunidade sira atu ajuda sira hodi hala’o servisu lorloron”, nia konklui.
Jornalista : Felicidade Ximenes
Editór : Zezito Silva
