DILI, 30 juñu 2023 (TATOLI)—Diretór Servisu Saúde Manatuto, Mateus Vicente Correia, hateten durante fulan maiu, moras ne’ebé rejista mak Infesaun Vias Respiratóriu Aguda (ISPA) hamutuk 320.
“Durante fulan maiu, ita rejista moras Infesaun Vias Respiratóriu Aguda hamutuk 320, husi ne’e mane 148 no feto 172”, Mateus Vicente Correia dehan ba TATOLI via telefone, ohin.
nia informa, moras Ispa ne’e afeta ba labarik kiik no mós ema boot sira tanba haree ba klima Timor-Leste nian ne’ebé daudaun ne’e akontese katak udan monu rai.
“Moras ispa ne’e nia sintomas mai husi rai rahun sira tanba klima ne’ebé mak iha katak udan tiha depois para ida ne’e halo ema moras liuliu labarik sira”, nia esplika.
Nia subliña, kona-ba tratamentu ba pasiente sira mai fasilidade saúde iha Manatuto, médiku sira halo intervensaun ne’ebé mak di’ak to’o sira rekopera tanba estoke aimoruk rasik sufisiente, iha ida rua mak menus maibé ida ne’e la difikulta ba tratamentu pasiente nian.
Kona-ba prevensaun ba moras ne’e mak uza nafatin máskara atu evita rai rahun sira atu labele hetan moras.
Sevisu Saúde Manatuto rejista mós moras kulit hamutuk lima, husi ne’e mane tolu, feto rua, diárea hamutuk 32, husi ne’e mane 10 no feto 22.
Jornalista : Felicidade Ximenes
Editór : Zezito Silva
