MS fasilita formasaun partu moos no seguru ba profisionál saúde iha Covalima
COVALIMA, 30 juñu 2023 (TATOLI)–Ministériu Saúde (MS) liuhosi Institutu Nasionál Saúde Públika Timor-Leste (INSP-TL) fasilita formasaun partu moos no seguru ba profisionál Saúde durante loron 10 iha munisípiu Covalima.
“Formasaun ida-ne’e importante tebes atu bele hasa’e ita-nia profisionál saúde hanesan médiku, parteira, enfermeiru no tékniku aliadu sira-nia koñesimentu, ita sira ema-ne’ebé iha kompeténsia atu fó tulun no atendimentu ba ita-nia komunidade no ita sai na’in ba atendimentu,” Diretora Nasionál Formasaun INSP-TL, Perpetua Ana Mery Estela Laot, hateten ba Agência Tatoli, iha salaun servisu munisipál saúde Polo, sesta ne’e.
Ministériu Saúde (MS) kontinua fasilita formasaun ba profisionál saúde sei kontinua nafatin, tanba tinan oin iha oportunidade di’ak agora bele halo ona planu ba orsamentu tinan 2024, munisípiu mós tau planu tipu formasaun saida munisípiu presiza atu hatán ba munisípiu nia problema kada trimesterál no moras saida mak aas.
Atu hamenus moras no problema ne’ebé aas profisionál saúde presiza iha uluk koñesimentu informasaun no abilidade atu bele implementa hodi halo atendimentu ba komunidade.
“Formasaun ne’e bazeia ba nesesidade munisípiu atu hatán hakarak atu hamenus númeru mortalidade inan ho oan, hamenus kazu ruma ho kosok-oan ne’ebé foin moris iha ita-nia atendimentu loro-loron. To’o iha tinan 2020, númeru sira-ne’e ita redus signifikante atu hatán ba tinan 2030, ita-nia preparasaun hahú agora,” nia dehan.
Iha tinan 2030, hakarak hamenus númeru mortalidade inan no oan ho signifikante la’ós redús mortalidade, maibé moras sira-ne’ebé hada’et ka la hada’et, nune’e preparasaun hahú agora.
Reprezentante Diretora Servisu Saúde Munisipál Covalima, Agapito de Jesus, hateten profisonál saúde sira tuir formasaun durante loron 10, bele aprende ona matéria ne’ebé formadór sira partilla hodi kompleta malu.
“Ha’u hanoin formasaun durante loron 10, ita aprende ona kona-ba partu moos no seguru nune’e profisonál saúde ne’ebé tuir formasaun, atu hamutuk hodi kompleta malu no halo komunikasaun,” nia dehan.
Ho nune’e, servisu saúde munisipál sei esforsu atu profisonál saúde ne’ebé seidauk tuir formasaun atu fó oportunidade, nune’e sira bele tuir formasaun maibé profisonál saúde ne’ebé tuir ona formasaun atu kompleta sira-ne’ebé seidauk tuir formasaun, nune’e halo atendimentu tuir matadalan.
“Ha’u fiar matadalan ne’ebé ita simu labele rai iha uma maibé rai didi’ak, nune’e ba sira-ne’ebé seidauk tuir formasaun bele lee,” nia hateten.
Formadora, Olinda Soares, hateten formasaun partu moos no seguru ba profisionál saúde sira iha munisípiu Covalima ne’e, partilla matéria lubuk ida kona-ba partu moos no seguru.
“Iha partu moos no seguru, ami hanorin matéria lubuk ida-ne’ebé ko’alia kona-ba prevensaun infesaun atendimentu inan ne’ebé partu, atendimentu bebé foin moris no bebé sira-ne’ebé moris ho problema.
Ho Formasaun partu moos no seguru ne’e, importante atu redús taxa mortalidade inan no oan iha munisípiu Covalima ne’ebé liuhosi formasaun teoria no prátika.
Pesoál saúde ne’ebé tuir formasaun durante loron 10 hahú iha loron 21 to’o 30 fulan-juñu tinan 2023 hamutuk na’in-15 ne’ebé kompostu hosi médiku, parteira no enfermeira mai hosi sentru saúde no postu saúde ne’ebé estabelese iha Covalima.
Jornalista : Celestina Teles
Editór : Cancio Ximenes
