Pesoál saúde preokupa postu-sentru saúde Covalima balun sei menus ekipamentu
COVALIMA, 30 juñu 2023 (TATOLI)–Pesoál Saúde, Celina de Jesus Nunes, preokupa tanba iha postu no sentru saúde balun iha Covalima sei menus ekipamentu saúde, nune’e Governu liuhosi Ministériu Saúde (MS) presiza fó apoiu fasilidade hanesan kama partu nian, ai-moruk nune’e pesoál saúde bele halo atendimentu tuir estandarizasaun.
“Durante halo atendimentu iha ami-nia kolega balun nia servisu fatin sei falta ekipamentu hanesan menus kama partu nian, formatu parnograf, ai-moruk balun laiha, nune’e atu halo atendimentu tuir estandarizasaun presiza fasilidade,” Pesoál Saúde, Celina de Jesus Nunes, hato’o preokupasaun ne’e iha salaun Servisu saúde Polo, Suai, sesta ne’e.
Nia hateten, pesoál saúde sira atu halo atendimentu ba inan isin-rua sira ho rekursu ne’ebé sufisénte, maibé menus fasilidade mós sai problema atu halo atendimentu tuir estandarizasaun no bainhira iha ekipamentu laiha rekursu mós problema.
“Maske labele responde hotu fasilidade sira, maibé bele responde ba kondisaun mínimu nune’e ami bele halo atendimentu iha ami-nia servisu fatin tuir estandarizasaun,” nia dehan.
Reprezentante Diretora Servisu Saúde Covalima, Agapito de Jesus klarifika sentru no postu saúde iha ekipamentu ne’ebé mínimu atu halo atendimentu ba komunidade, tanba ne’e bainhira menus fasilidade labele tuur nonook.
“Kona-ba ekipamentu-sira mínimu, ita iha fasilidade saúde, ita mak seidauk iha kapasidade natoon atu uza fasilidade balun sei menus ekipamentu, ita iha kapasidade komunika mai ami Ita bele buka meiu balun bele kompleta fasilidade,” nia dehan.
Tuir dadus ne’ebé Agência Tatoli asesu, Governu estabelese ona sentru saúde hitu (7) no postu saúde 24 iha munisípiu Covalima maibé sei menus rekursu umanu.
Jornalista : Celestina Teles
Editór : Cancio Ximenes
