DILI, 30 juñu 2023 (TATOLI)-–Primeiru-Ministru, Taur Matan Ruak no Primeiru-Ministru indijitadu, Kayrala Xanana Gusmão, hasoru malu no hakuak malu iha Palásiu Prezidensiál, Bairru Pité, sesta ne’e, hafoin tinan barak nia-laran la hasoru malu.
Tuir obsevasaun Agência Tatoli iha terrenu, nota katak Taur Matan Ruak to’o iha Palásiu Prezidensiál besik tuku 09:00 enkuantu, Xanana Gusmão to’o iha tuku 09:00.
Iha Palásiu Prezidensiál, Taur Matan Ruak, tuur oituan iha Prezidente Repúblika, José Ramos Horta nia fatin no Xanana Gusmão akompaña hosi Sekretáriu Jerál CNRT, Francisco Kalbuadi Lay, tuur iha sala espera, la kleur de’it, Prezidente Horta to’o iha fatin no hasoru Taur Matan Ruak , enkuantu Xanana Gusmão nafatin iha sala espera.
La to’o minutu lima, Prezidente Horta lori Taur Matan Ruak sai hosi ninia fatin hodi ba hasoru malu ho Xanana Gusmão, hafoin ne’e sira hasoru malu no hakuak malu.
“Bom dia Maun-Boot, Maun-Kiik hakuak Maun-Boot,” Prezidente Horta dehan.
Hafoin ne’e, sira na’in-tolu la’o hamutuk bá fatin reuniaun no halo enkontru kuaze minutu 30 nia-laran. Nune’e, iha tuku 09:36 sira na’in-tolu tun hamutuk mai hasoru malu ho jornalista sira ne’ebé hein hela.
“Lutadór na’in-rua ba nasaun no povu, ida (Xanana) estratega no ida (Taur) seluk tátiku militár, sira na’in-rua riku ho esperiénsia iha pasadu no durante tinan-20 konstrusaun nasaun,” Xefe Estadu deskreve.
“Atu dehan hanesan ne’e jauh di mata dekat di hati,” Taur hateten ho hamnasa.
Notísia relevante : Membru IX Governu tenke prienxe kritériu tolu
Tuir ajenda ne’ebé fó sai hosi Prezidénsia Repúblika, ajenda iha loron sesta (30/06) iha tuku 09:00 iha hasoru malu entre Prezidente Repúblika, José Ramos Horta no Primeiru-Ministru, Taur Matan Ruak, maibé laiha ajenda hasoru malu entre Xefe Estadu no Primeiru-Ministru indijitadu, Kayrala Xanana Gusmão tanba hasoru malu horiseik ona.
Jornalista : Antónia Gusmão
Editora : Julia Chatarina
