DILI, 01 jullu 2023 (TATOLI) – Ministra Edukasaun, Dulce de Jesus Soares, promete katak iha mandatu loron 100 dahuluk sei halo avaliasaun hodi haree fali serbisu ne’ebé nia la konsege halo iha mandatu tinan rua iha VIII Governu Konstitusionál nian, nune’e bele presta fali serbisu ho kualidade iha governasaun agora.
“Ha’u mai atu kontinua filafali serbisu ne’ebé maka ha’u la konsege halo hotu iha tinan rua nian laran iha mandatu VIII Governu nian. Ha’u sei halo uluk avaliasaun hodi haree fali saida maka ha’u seidauk halo atubele kontinua fali hodi garante kualidade no atinje meta ne’ebé mak planeia ona”, Dulce de Jesun informa asuntu ne’e iha ámbitu tomada pose membru IX Governu, iha Palásiu Prezidensiál, Bairro Pité, ohin.
Avaliasaun ne’ebé ministra foun halo ne’e mak hadi’a sistema halo di’ak hodi hala’o serbisu iha mandatu Governu Dasiak atubele atinje meta sira iha tinan lima nia laran hodi lori progresu ba edukasaun iha país.
Nia dehann iha mandatu agora ne’e konsidera todan, tanba responsabilidade ida ne’e la’ós oportunidade no iha diskursu Primeiru-Ministru Kay Rala Xanana Gusmão nian ezije atu IX Governu tenke hatudu kapasidade atu serbisu iha setór hotu-hotu, inklui edukasaun rasik, nune’e bele tau duni importánsia ba kualidade edukasaun. “Kuandu membru Governu Dasiak ne’e maka la hatudu ninia kualidade iha serbisu, hasai tiha tau fali ema seluk”, nia afirma.
Tanba ne’e tuir Dulce Soares, molok atu hala’o mandatu iha tinan lima nia laran ne’e, nia sei halo uluk avaliasaun ba ninia serbisu sira, depois maka nia sei aselera serbisu edukasaun nia iha loron 100 nia laran. Avaliasaun ne’ebé maka sei halo mak halo levantamentu dadus ba kualidade profesór sira hodi buka hatene progresu manorin ida-idak nian, nune’e bele loke oportunidade hodi halo distribuisaun profesór ezistente sira hodi bele aumenta forsa traballu iha eskola sira.
“Planu IX Governu nian iha tinan lima nia laran ne’e katak ho profesór kualidade de’it maka bele garante kualidade edukasaun ida atu estudante sira bele hetan prosesu aprendizajen ida di’ak liu”, nia salienta.
Tanba ne’e iha loron 100 nia laran ne’e maka sei termina buat lubun ida ba futuru atu nune’e saida de’it maka Governu ne’e sei halo bele tau duni prioridade ba planu sira ho kualidade, nune’e ema hotu liuliu profesór no alunu sira bele hetan duni ninia benefísiu.
Dulce de Jesus antes ne’e asume kargu nu’udar Ministra Edukasaun, Juventude no Desportu iha Governu Daualuk hafoin toma pose husi eis-Prezidente Repúblika, Francisco Guterres Lú Olo, iha loron 22 juñu 2018. Iha loron 25 maiu 2020 Ministra Edukasaun ne’e hatama karta rezignasaun ba eis-Primeiru-Ministru, Taur Matan Ruak.
Jornalista: Tomé Amado
Editora: Maria Auxiliadora
