iklan

HEADLINE, SAÚDE

Saúde maternál infantil, nutrisaun sai prioridade ba MS

Saúde maternál infantil, nutrisaun sai prioridade ba MS

Ministra Saúde, Élia António de Araújo dos Reis Amaral. Imajen/Egas Cristovão

DILI, 01 jullu 2023 (TATOLI)-Ministra Saúde, Elia dos Reis Amaral, hafoin simu tomada pose husi Prezidente Repúblika (PR), José Ramos Horta, ba jornalista sira katak sei tau prioridade ba saúde maternál infantil, nutrisaun inklui prioridade relevante seluk.

“Ita-nia polítika dezenvolvimentu estratejiku saúde ne’ebé mak define katak tenke tau prioridae mós ba iha saúde maternál infantil oinsá haree ba nutrisaun ba komunidade liu liu ba labarik sira ne’ebé kresimentu la tuir nia altura. Nune’e foka  mós   ba iha moras hada’et no mós moras lahada’et sira  inklui haree mós  ba planu vasinasaun hodi  hasa’e taxa kobertura   no atendimentu ba populasaun sira,” Ministra Elia dos Reis Amaral hateten, iha Palásiu Prezidensiál, Bairru-Pité, sábadu ne’e.

Ba mandatu loron 100 nian, tuir autoridade másima MS ne’e katak sei bolu dirijente sira iha MS para bele fó hanoin hamutuk hodi rezolve problema sira ne’ebé mak iha liu liu liga ba iha estoke ai-moruk sira iha postu saúde, sentru saúde, ospitál referál no nasionál sira ne’ebé mak sei enfrenta problema ekipamentu sira.

“Ohin ita simu ona tomada de posse entaun ba oin ha’u sei bolu dirijente sira iha MS nia laran rasik no mós Servisu Autónomu sira atu haree   dezafiu sira ne’ebé mak durante ne’e hasoru atu nune’e ita bele rezolve para bele fó moris di’ak ba ita-nia povu sira ne’ebé presiza ita,” nia informa.

Tanba ne’e, tuir governante ne’e Saúde maternál infantil, nutrisaun no foka ba moras hada’et no mós moras lahada’et sira inklui haree mós ba planu vasinasaun hodi hasa’e taxa kobertura   no atendimentu ba populasaun sira, sai prioridade ba MS.

Jornalista   : Felicidade Ximenes

Editór         : Rafael Ximenes de A. Belo

iklan
iklan

Leave a Reply

iklan
error: Content is protected !!