Xefe Estadu louva serbisu Primeiru-Ministru sesante
DILI, 01 jullu 2023 (TATOLI)—Prezidente Repúblika (PR), José Ramos Horta, louva serbisu Primeiru-Ministru sesante, Taur Matan Ruak, ho membru VIII Governu Konstitusionál durante mandatu.
“Ha’u-nia liafuan dahikus mak ba ha’u-nia estimadu Primeiru-Ministru, Taur Matan Ruak. Ha’u kumprimenta ita-boot kona-ba oinsá ita-boot kaer Governu hosi 2018. Ha’u kumprimenta mós membru sira hotu hosi ita-nia Governu. Maske susar oioin, pandemia COVID-19, dezastre naturál, krize polítika, funu Ukránia, inflasaun mundiál, ho impaktu hotu boot no kle’an iha ekonomia mundiál nomós Timor nian, ita-boot hatene, ho laran-kmaan no kalma, lori programasaun governasaun ba oin ho di’ak,” PR Horta hateten liuhusi diskursu iha ámbitu serimónia pose ba Primeiru-Ministru ho membru Governu IX iha Palásiu Prezidensiál Nicolau LObato, Bairru Pite, sábadu ne’e.
Xefe Estadu mós dala ida tan hato’o ninia sentimentu no kondolénsia espoza Promeiru-Ministru sesante ne’ebé hakotu iis iha semana hirak ba kotuk.
“Ha’u hato’o dala ida tan ha’u-nia sentimentu no kondolénsia ba lakon boot ita hasoru bainhira foin lakon ita-nia espoza Mana Isabel Ferreira. Ha’u akompaña ita-boot , ita nia oan sira no família tomak, iha momentu terus ne’e. Imajen no hanoin Mana Isabel hela ho ami nafatin,” nia dehan.
Iha parte seluk, Prezidente Repúblika, mós hato’o nia liafuan ho ksolok ba Prezidente no Deputadu sira hosi lejislatura dalima (2018–2023), liuliu, eis Prezidente PN, Aniceto Longuinhos Guterres, ba nia jeitu profisionál, justu no imparsiál, bainhira hala’o kna’ar iha ita-nia uma-fukun.
Jornalista : Nelson de Sousa
Editór : Cancio Ximenes
