DILI, 03 jullu 2023 (TATOLI) – Ministra Edukasaun, Dulce de Jesus Soares, sei tau prioridade hodi halo preparasaun ida di’ak atu asegura kualidade ezame nasionál ne’ebé sei realiza iha outubru.
“Hanesan Ministra Edukasaun ha’u sei garante nafatin prosesu aprendizajen ida ho kualidade iha eskola sira, tanba ne’e ha’u-nian planu prioridade ida maka atu halo preparasaun ho másima hodi garante ezame nasionál ba estudante sira iha tinan ida ne’e tenke la’o di’ak”, governante informa asuntu ne’e hafoin serimónia transferénsia serbisu, iha Vila Verde.
Atu garante preparasaun ba ezame nasionál la’o ho adekuadu, Dulce de Jesus sei halo serbisu iha semana dahuluk mak enkontru ho diretór servisu edukasaun munisipál sira. Sei vizita mós eskola sira hodi haree no rona difikuldade saida maka eskola sira enfrenta no saida maka ministériu tenke halo atu dudu prosesu aprendizajen la’o ho di’ak, nune’e bele asegura ezame nasionál ba estudante iha fulan haat nia laran.
Tanba ezame nasionál maka sai eventu importante ida iha Ministériu Edukasaun, ne’e duni tenke halo planu ida di’ak atu lori ezame ne’e la’o ho susesu no garante duni ninia kualidade. Sei halo avaliasaun ba preparasaun sira ne’ebé maka ekipa téknika iha ministériu nian hala’o ona, nune’e bele deside ninia kontinuasaun ida ho loos ba preparasaun ezame ne’e rasik.
“Presiza konfirma mós preparasaun sira ne’ebé maka VIII Governu, liuhusi eis-Ministru Edukasaun, Juventude no Desportu trata ona. Tanba ne’e, presiza haree sira-nia preparassaun hotu depois maka buat ne’ebé presiza atu aselera, ida ne’e maka sei hala’o”, katak.
“Ami la mai atu halo buat foun, maibé sei kompleta buat ne’ebé maka sira seidauk kompleta ne’e mak ami sei aselera, nune’e bele atinje meta ne’ebé ita hotu hakarak iha prosesu ezame nasionál nia laran”, realsa.
Jornalista: Tomé Amado
Editora: Maria Auxiliadora
